lunes, 10 de agosto de 2026
O presidente da Xunta, Alberto Núñez Feijóo, subliñou o compromiso do Goberno galego co sector da enerxía e a aposta polo medio ambiente e reiterou o obxectivo de que o 95% do total do consumo de enerxía na Comunidade proveña de fontes renovables. O ano pasado estabamos no 66% e o obxectivo é chegar ao 95%, incidiu, ao que engadiu que para acadar esta cifra, a Xunta seguirá traballando no eido da produción hidráulica, no desenvolvemento do concurso eólico e no eido da biomasa.
No tocante á produción de enerxía hidráulica, Feijóo avogou pola repotenciación dos embalses para returbinar a auga e producir máis enerxía sen incrementar nin os pantanos nin os encoros. Respecto ao medio ambiente coa utilización máxima da capacidade hidroeléctrica instalada a través da repotenciación; e seguiremos tamén desenvolvendo todo o concurso eólico co máximo compromiso co medio ambiente, diminuíndo o número de aeroxeradores de xeito que un parque de 20 ou trinta 30 se converta nun parque de dous ou tres, coa mesma potencia pero diminuíndo o impacto visual.
No eido da biomasa, o presidente autonómico afirmou que o obxectivo é investir e mobilizar máis de 450 millóns de euros entre 2014 e 2020, o que suporá 1.000 empregos directos só neste sector e unha diminución dos riscos forestais, debido ao aproveitamento máis razoable dos montes galegos.
Durante a inauguración da subestación eléctrica de Cangas II, Feijóo referiuse ao sector da enerxía como un sector estratéxico para os territorios, xa que aqueles que teñan garantido o subministro, que teñan garantido as fontes de enerxía e que avancen nas enerxías renovables terán un plus para captar a instalación de mercados, de empresas e industrias.
Nesta liña, afirmou que os 45.000 habitantes da comarca contan, desde agora, cun servizo mellorado a todos os niveis: en calidade, ao evitar os cortes e garantir o subministro; en seguridade, ao levar a subestación fóra do centro urbano; en respecto polo medio ambiente, ao situar a infraestrutura nunha zona de menor afectación; e no aspecto económico, coa mellora do subministro ás empresas.
En definitiva, estamos a falar dunha infraestrutura básica, consecuencia de acordos entre o Concello, a empresa subministradora e a Xunta, que garante unha subministración de calidade aos veciños pero tamén a todo o tecido empresarial da comarca, dixo.
Galicia, produtora do 17,4% da electricidade de España xerada con tecnoloxía eólica
Ao longo da súa intervención, Feijóo destacou a aposta da Xunta pola calidade e a seguridade do subministro eléctrico, afirmando que infraestruturas como esta subestación reforzan a posición que Galicia ten na produción de enerxía eléctrica no conxunto de España. Non en van, en 2013, Galicia tivo unha produción eléctrica un 13% máis que o ano anterior, o que lle permitiu escalar unha posición ata situarse como a terceira Comunidade produtora en España.
Esta posición mellora se temos en conta as enerxías renovables: Galicia é a segunda produtora de enerxía eólica -produce o 17,4% da electricidade de España xerada con tecnoloxía eólica, un 18% máis que en 2012-. E, en canto á produción de electricidade mediante tecnoloxía hidráulica, a Comunidade galega é líder nacional, xa que case o 25% de toda a enerxía eléctrica producida en España por medios hidráulicos se fai na nosa Autonomía.
Estes datos que rexistra Galicia no campo da enerxía eléctrica tamén se dan en canto ao subministro ao resto de España: a nosa terra compartiu en 2013 13.107 GWh, un 47% máis que en 2012, o que a coloca como a segunda comunidade no ranking nacional, só superada por Castela e León.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
