sábado, 31 de octubre de 2026
A Consellería de Cultura, Educación e Ordenación Universitaria, representada polos secretarios xerais de Cultura e de Política Lingüística, Anxo Lorenzo e Valentín García, respectivamente, sumouse á homenaxe a Rosalía de Castro que tivo lugar na Casa-Museo da escritora, en Padrón, con motivo do día no que se cumpren 129 anos do seu pasamento.
Durante o acto institucional, Anxo Lorenzo agradeceulle á Fundación Rosalía de Castro esta chamada á reunión, arredor da palabra e da música, da poesía, como un acto para o non esquecemento da escritora, unha celebración conxunta que tamén destacou como unha oportunidade para falar da nosa construción cultural, da capacidade creativa en diálogo co colectivo, do valor e das inquedanzas arredor da lingua galega.
Un espazo común arredor de Rosalía
É significativo que nesas reflexións arredor de Rosalía de Castro xurda sempre un espazo común, no que están poetas, institucións e sociedade en xeral, sen exclusión e sen dogmatismos, afirmou. Nese sentido, Anxo Lorenzo salientou a capacidade da escritora de chegar a todos e a todas, ao tempo que se referiu a ela como un ben central na nosa cultura compartida. Dalgunha maneira engadiu, ela é capaz aínda hoxe de abrirnos os ollos á existencia dunha cultura galega propia e singular, cunha raíz milenaria que paga a pena cultivar e facer medrar.
Na súa intervención, o secretario xeral tamén recordou que hai moito no que hoxe somos que lle debemos ao que Rosalía nos anticipou, aos camiños que ela abriu. Por iso dixo, saudamos con gratitude, cada ano, as voces que se unen a esta celebración, con novos versos e novos tons, para seguir revitalizando a súa achega e poñendo a súa voz na actualidade.
O acto de homenaxe á escritora, que congregou na Casa-Museo Rosalía de Castro numerosas personalidades do ámbito cultural e político, tamén foi o escenario da presentación das obras gañadoras do II Premio Escolar Rosalía de Castro.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
