Notas de prensa

Rematado o informe de titulacións do Sistema Universitario Galego para o curso 2014-15

Confírmase a impartición do Grao en Ciencias da Linguaxe e Estudos Literarios da UVigo, tras os cambios esixidos no informe provisional de verificación. Pero denegouse a autorización ao Grao en Enxeñaría Física, xa que a titulación obtivo informe desfavorable da axencia avaliadora independente.

O pleno extraordinario do Consello Galego de Universidades (CGU), presidido polo conselleiro de Cultura, Educación e Ordenación Universitaria, Xesús Vázquez Abad, rematou o proceso de informe das titulacións que se impartirán no Sistema Universitario de Galicia (SUG) o vindeiro curso, das cales aínda 7 están pendentes do informe final de verificación por parte da axencia avaliadora independente. Ademais, os membros do CGU foron informados das titulacións que, tras superar no anterior pleno a votación do Consello condicionada ao informe final de verificación, contan xa co visto e prace da Axencia para a Calidade do Sistema Universitario de Galicia (ACSUG).

O proceso completouse coa votación das titulacións - con resultado desfavorable – da autorización das titulacións de Grao en Arquitectura e de Grao en Administración e Dirección de Empresas, que substituirían ás que había neste centro, ata o momento vencellado ao University College Dublin.

O conselleiro explicou ademais aos membros do Consello Galego de Universidades que a axencia avaliadora independente, a ACSUG, emitiu informe final de verificación desfavorable respecto do Grao en Enxeñaría Física proposto pola UVigo. Neste sentido Vázquez Abad lembrou que, tal e como pediran varios membros do CGU, a titulación non fora sometida no anterior pleno do Consello a votación, xa que “non quedaba claro, entre outros, o encaixe da titulación na rama de coñecemento de enxeñaría ou na de ciencias, coas consecuencias que iso podería ter na decisión final dos vogais. Así mesmo, ante a polémica suscitada respecto desta titulación, acordouse esperar a contar co informe definitivo de verificación da axencia e, no caso de ser favorable, someteríase a informe deste pleno a proposta de implantación do título”.

Unha vez emitido pola ACSUG o informe final desfavorable, tal e como explicou o conselleiro, non é pertinente solicitar o informe do Pleno do Consello Galego de Universidades. “Estamos - dixo- diante dunha titulación que non superou o procedemento de verificación da axencia avaliadora independente, requisito sine qua non para poder tramitar, no seu caso, a autorización de implantación”.

Luz verde da ACSUG a 6 titulacións

No que atinxe ás titulacións votadas no pleno do CGU do pasado 26 de maio, e que estaban condicionadas ao informe favorable da ACSUG, o conselleiro informou hoxe de que 6 delas xa obtiveron luz verde por parte desta axencia avaliadora independente. Así, o inicialmente denominado ‘Grao en Ciencias da Linguaxe’, da Universidade de Vigo, impartirase o vindeiro curso 2014/2015 baixo a denominación de ‘Grao en Ciencias da Linguaxe e Estudos Literarios’, unha das modificacións esixidas pola ACSUG no informe provisional, sen cuxo cumprimento non tería sido posible a obtención do informe final favorable. Así mesmo a UVigo realizou numerosos cambios no que se refire á reestruturación de materias, que posibilitaron que o informe final fora favorable. Este novo grao vén a substituír ao Grao de Estudos de Galego e Español.

Tal e como explicou o conselleiro, tamén cambiou de denominación o Máster Universitario en Ciencia e Tecnoloxía Agroalimentaria e Ambiental da Universidade de Vigo, denominación inducida polo informe provisional de verificación, e que obtivera o informe favorable do CGU baixo a denominación de Máster Universitario en Recursos Naturais e Tecnoloxía Agroalimentaria. Ademais das dúas devanditas, outras catro titulacións que foran votadas no anterior pleno do Consello contan xa co informe final favorable da ACSUG, en concreto o Grao en Enxeñaría agrícola e Agroalimentaria (USC), o Máter en Arqueoloxía e Ciencias da Antigüidade (USC e UVigo), o Máster en Física (USC) e o Programa de Doutoramenteo en Estudos Culturais: Memoria, Identidade e Territorio (USC)

Para o resto de titulacións – un total de 7- que obtiveran a votación favorable provisional na xuntanza anterior do pleno do CGU a ACSUG emitirá informes finais o 29 de xullo.

Gabinete de Comunicación da Xunta de Galicia, 2014-07-11

Actualidad

Foto del resto de noticias (tecnoloxia-mobil.jpg) En torno ao 75% do alumnado galego de 5º e 6º de Primaria e de ESO dispón de teléfono móbil e a maioría conéctase a internet practicamente a diario, segundo se desprende da V Enquisa de diagnose da convivencia 2025. O estudo consta dun amplo bloque sobre a convivencia nos centros escolares tanto para alumnado de ensino obrigatorio (Primaria e ESO) como postobrigatorio (Bacharelato e Formación Profesional) e outro bloque enfocado aos hábitos sociais do alumnado, que se introduciou por primeira vez na enquisa de 2023. Arredor do 90% do alumnado (91,6% dos estudantes de 5º e 6º de Educación Primaria, o 84,33% dos de ESO e os 78,83% dos de ensinanzas postobrigatorias) afirman que nunca ou case nunca recibiu condutas intimidatorias por estes medios.
Foto de la tercera plana (reinventio.jpg) Reinventio combina números de ilusionismo, acrobacias e danza contemporánea nunha proposta de 90 minutos que aborda a ilusión, a superación e o espírito transformador do Camiño de Santiago. A dirección artística corre a cargo do ilusionista ferrolán Martín Varela, xunto coa coreógrafa Mercedes Suárez e a compañía Druida Danza, profesionais galegos de ampla traxectoria que integran elementos de danza clásica e contemporánea con técnicas circenses innovadoras, acompañadas dun coidado deseño escenográfico, musical e lumínico que reforza o carácter visual e emocional do espectáculo.

Notas

Baixo o nome de Dorna, unha embarcación típica das Rías Baixas, comezou a navegar no océano literario do ano 1981 unha nova revista de creación literaria que pretendía “ofrecer unha canle editorial a autores e autoras noveis con arelas no cultivo da literatura galega”, malia recoller tamén “a voz de escritores e escritoras xa consagrados”. Así describen dende Edicións USC a meta que perseguía e persegue esta revista que case medio século despois permanece viva baixo a dirección da profesora Mª Xesús Nogueira.
Tras o éxito da súa primeira edición en 2021, o II Congreso Internacional 'A viaxe a través da palabra' consolidouse como un espazo de diálogo entre literatura, creación, investigación, turismo e industrias culturais. O encontro, celebrado os días 16, 17 e 18 de outubro, reuniu a numeroso persoal experto de recoñecido prestixio que abordaron o concepto da viaxe como espazo de intercambio e comunicación.
PUBLICIDAD
ACTUALIDAD GALICIADIGITAL
Blog de GaliciaDigital
HOMENAXES EGERIA
PUBLICACIONES