lunes, 10 de agosto de 2026
O presidente da Xunta de Galicia, Alberto Núñez Feijóo, inicia unha viaxe institucional a México e Panamá para seguir afondando nas oportunidades económicas e industriais que ambos os dous países ofrecen.
Durante a viaxe, na que estará acompañado polo conselleiro de Economía e Industria, Francisco Conde, o responsable do Executivo galego manterá diversos encontros institucionais e económicos, e reunirase tamén coa colectividade galega. Deste xeito, o Goberno galego segue centrando na economía a súa axenda exterior, apostando de forma decidida pola internacionalización da economía galega.
Non en van o país azteca vén de dar, a través da alianza estratéxica coa petroleira Pemex, grandes oportunidades a Galicia, que a Xunta se propón continuar no futuro. Por iso, manter México como un aliado privilexiado e aproveitar as posibilidades de mercado que para as empresas galegas ofrece Panamá, diante do seu crecemento, son os obxectivos principais desta viaxe.
A Xunta seguirá tendo nestes dous países un destino prioritario dentro da súa axenda internacional e, neste sentido, cómpre lembrar o labor levado a cabo pola Rede de Plataformas no Exterior. A Rede Pexga tense demostrado axeitada polo seu nivel de actividade especialmente nos mercados de América Latina, xa que as catro plataformas latinoamericanas concentran máis da metade das accións realizadas.
Os datos teñen demostrado que seguir afondando na internacionalización é útil para a economía galega e útil para os emprendedores. Desde o ano 2009 conseguíronse avances moi importantes neste eido que permitiron, por exemplo, incrementar un 29 % o número de empresas exportadoras ata chegar case ás 6.400, así como acadar un récord histórico de exportacións, que sumaron 18.419 millóns de euros o pasado ano. Isto representa un 32 % máis que en 2009, sendo Galicia a cuarta comunidade máis exportadora de toda España en 2013, ano en que as exportacións galegas medraron un 11,7 %.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
