Notas de prensa

O cupón da ONCE do 15 de marzo adícase aos espazos termais galegos

O conselleiro de Cultura, Educación e Ordenación Universitaria, Xesús Vázquez Abad, presentou o cupón da ONCE do sábado día 15 de marzo, que está dedicado aos espazos termais galegos. Así, nun acto desenvolvido na Cidade da Cultura, e xunto ao delegado territorial da ONCE en Galicia, Manuel Martínez Pan, o conselleiro, que recibiu unha réplica enmarcada do cupón que xa está a venda, destacou a importancia que ten esta iniciativa.

Na presentación tamén estiveron presentes a directora de Turismo de Galicia, Nava Castro, presidente e xerente da Asociación de Balnearios de Galicia, Antonio Garaloces e Benigno Amor, respectivamente, así como Javier Soto, xerente da Caldaria.

Promoción de Galicia

A imaxes do termalismo galego, reflectido neste caso nas termas romanas de Lugo, chegaran a todos os recunchos do Estado a través dos cinco millóns e medio de cupóns que a Organización puxo xa á venda para o sorteo do día 15.

Durante a súa intervención o conselleiro destacou que “trátase dunha iniciativa que achegará o termalismo a todo o Estado a través da emisión de cinco millóns e medio de cupóns, que desde onte xa están á venda, nos que quedan reflectidas as termas romanas de Lugo, un dos complexos monumentais máis senlleiros da nosa terra”, e recordou que “está non é a primeira vez que a ONCE colabora coa difusión de espazos e actividades relacionadas con Galicia xa que dende hai máis de 15 anos veñen promovendo o patrimonio e a cultura galegas a través do deseño dos cupóns”.

Pola súa banda a directora de Turismo de Galicia, Nava Castro, sinalou que a auga termal forma parte dos nosos recursos endóxenos e como destino líder na oferta de termalismo do Estado, tanto en calidade como en cantidade, temos a opción de configurar produtos turísticos orientados para diversas tipoloxías de viaxeiros. E lembrou que para a posta en valor desta enorme potencialidade, vense de presentar o noso Plan de Termalismo, que aproveita as sinerxías creadas entre os diferentes recursos e produtos e incide na especialización e na paquetización dos nosos recursos termais.

De igual modo, resaltou que Plan Integral de Turismo de Galicia o termalismo figura como un produto con gran potencial desestacionalizador e con versatilidade para a adaptación a diversos públicos. “Na nosa segunda liña estratéxica, centrada na oferta turística baseada no patrimonio e nos recursos endóxenos inclúense accións orientadas ao desenvolvemento do Club de Produto Turístico da Auga de Galicia e mais á promoción de produtos turísticos emerxentes, incidindo no turismo de saúde e na posta en marcha de programas específicos”.

Impulso da auga

Con esta acción a Xunta de Galicia volve a mostrar a súa aposta por impulsar un dos bens que posúe a comunidade como é o termalismo. Unha iniciativa que se une á mostra “Agua Doce” que proximamente abrirá as súas portas no Museo Centro Gaiás da Cidade da Cultura e que xirará arredor dos recursos hídricos de Galicia. Será unha exposición multidisciplinar formada por 700 obras nas que grandes mestres da arte lle renden unha homenaxe a un elemento clave na identidade galega como é a auga doce.