lunes, 10 de agosto de 2026
O presidente do Goberno galego, Alberto Núñez Feijóo, destacou que Galicia rexistrou nos tres primeiros trimestres de 2013 un nivel de execución e de pagamentos mellor que a media de comunidades e, ao mesmo tempo, neste período foi quen de reducir o seu déficit público nun 31% en relación ao terceiro trimestre do pasado ano, ao tempo que mantén un déficit inferior á media.
Así mesmo, Feijóo precisou que, segundo un informe da Consellería de Facenda, o déficit público da comunidade situouse, no terceiro trimestre, no 0,8% en termos de cumprimento do obxectivo de estabilidade orzamentaria; unha cifra 2 décimas menor que a media das comunidades autónomas que, a 30 de setembro de 2013 alcanzou o 1%.
O titular da Xunta subliñou, tamén, que Galicia está sendo capaz de manter uns niveis de execución mellores que a media das comunidades, ao ser, no peche do terceiro trimestre, a porcentaxe de gasto executado 2 puntos superior á media. Mentres que os pagamentos sobre o total de obrigas alcanzaron o 96 %, 8 puntos máis.
Nesta mesma liña, referiuse á execución dos orzamentos no eido dos investimentos reais (capítulo VI). Neste capítulo, Galicia executou case o 60% do gasto, 15 puntos máis que a media das Comunidades, mentres que os pagamentos tamén superan en case 15 puntos a media.
Galicia segue a mostrar un mellor ritmo de execución orzamentaria ao combinar o difícil equilibrio entre cumprir o déficit e executar o orzamento; e dentro dese equilibrio, avanzar algo máis: executar os investimentos, porque se cumprimos o déficit non investindo evidentemente non conseguimos o obxectivo que perseguimos, advertiu Feijóo.
Se atendemos á lexislatura completa, 2009-2012 Galicia converteuse, xunto con Madrid, nunha das comunidades con menor déficit público do conxunto do Estado autonómico: 4 puntos menos que o resto das comunidades autónomas.
O informe da Consellería de Facenda ratifica tamén que, neste exercicio 2013, o Goberno autonómico volverá cumprir co obxectivo de estabilidade orzamentaria, fixado para Galicia no 1,2% polo Consello de Política Fiscal e Financeira.
Deste xeito, a comunidade galega achegará, polo tanto, ese compromiso coas contas públicas e imos tentar compatibilizar o que conseguimos no ano 2012, que é reducir o déficit público e un comportamento do produto interior bruto autonómico superior á media de España, sinalou o presidente galego. Neste sentido, lembrou que o PIB no ano 2012 foi 7 décimas mellor que a media de España; e que Galicia se converteu na segunda comunidade autónoma de menor recesión no ano 2012 do Estado autonómico.
Diante destas cifras, Feijóo resaltou que estamos a executar o orzamento, estamos pagando aos provedores e estamos cumprindo o déficit público, que é o obxectivo dun goberno responsable neste momento e incidiu no grado de execución dos investimentos e no grao de pagamento dos investimentos na comunidade autónoma.
Seguimos tendo menor déficit que a media das comunidades autónomas; executamos máis que a media das comunidades autónomas; e pagamos mellor que a media das comunidades autónomas. Este é o obxectivo no que imos seguir traballando para finalizar no ano 2013 con este ránking de eficiencia no gasto público, que é unha forma de medir a responsabilidade dun goberno, concluíu.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
