Notas de prensa

José Ramón Ónega, presidente de honra do Centro Galego de Madrid

O delegado da Xunta de Galicia en Madrid, José Ramón Ónega, foi nomeado Presidente de Honra do centenario Centro Galego de Madrid, distinción que recibiu de mans do presidente do Centro, Fernando de Castro López-Vilarino. O acto tivo lugar no transcurso dunha cea celebrada nas instalacións da entidade á que asistiron, entre outros moitos, a ministra de Fomento, Ana Pastor, o presidente do Consello de Estado, Romay Beccaría, o maxistrado do Tribunal Supremo Ramón Trillo, o letrado maior do Consello de Estado, Leopoldo Calvo Sotelo, e o xornalista Fernando Ónega, ademais de maxistrados, políticos, catedráticos, representantes das principais entidades galegas en Madrid e familiares e amigos do homenaxeado. Tamén se citaron adhesións de, entre outros, o presidente da Xunta, Alberto Núñez Feijóo, o vicepresidente da Xunta, Alfonso Rueda, o exministro César Antonio Molina, o exalcalde de Madrid José María �lvarez del Manzano, o político Jorge Moragas, e os parlamentarios José Manuel Barreiro, José Blanco López e José Luis Rivera López.

Ana Pastor resaltou o cariño e aprecio que sente por Ónega, con quen traballou en Interior, ao que se referiu como "un grande home e un bo amigo", de "prestixio profesional e larga e frutífera traxectoria" e do que dixo ter aprendido "que o entusiasmo e a dedicación son cousas importantes na vida". Tamén Fernando de Castro destacou, sobre todo, a súa amizade e colaboración co Centro Galego.

Como resaltou Ónega no seu discurso de agradecemento, este nomeamento "leva consigo unha cantidade infinita de afecto e un mundo entrañable de amizade". Un discurso no que fixo un acendido eloxio da galeguidade, con referencia expresa aos emigrantes, de cuxo "espírito de axuda e necesidade de apoio nacería este Centro Galego de Madrid fundado no ano 1892". "Ou sexa, que estamos a falar de 121 anos de antigüidade, de auxilio e axuda, de esforzo e solidariedade", subliñou, glosando un pouco a historia do Centro Galego e resaltando do mesmo que foi "sempre un lugar de encontro, repouso, morriña e espazo de cultural, irmandade e axuda aos galegos que remediaban aquí a morriña, combatían en ansia do retorno e soñaban o paraíso perdido".

Así mesmo fixo referencia expresa ao peso específico que na actualidade ten a galeguidade en Madrid, citando a presenza de importante galegos nos organismos oficiais e na Igrexa e aos centros e asociacións profesionais que constituíu, cuxos principais representantes se achaban no acto.

Un acto que estivo cargado de sorpresas para Ónega. Foi conducido polo locutor Elías Rodríguez, que o abriu lendo unha emotiva carta de Gonzalo Ónega, fillo do homenaxeado, cuxas obrigas como maxistrado-xuíz en Málaga lle impediron asistir á homenaxe, e o pechou dando paso á lectura doutra carta que lle dirixiron as súas netas, Esther e Alejandra, pero esta vez realizada por elas mesmas que, excepcionalmente, romperon os seus horarios para ser a sorpresa final de tan excepcional noite. Misivas ambas as dúas que emocionaron a Ónega e a súa muller, María Esther Coladas, que o acompañou.