Notas de prensa

A Estratexia de Especialización Intelixente RIS 3, folla de ruta para a innovación

O presidente da Xunta, Alberto Núñez Feijóo, asegurou que o Goberno galego puxo xa en marcha a estratexia para facer dos incipientes síntomas positivos que asoman na economía os cimentos dun modelo económico “máis competitivo e sustentable”. Lembrou que, por primeira vez desde hai anos, Galicia manexa a previsión de que en 2014 será capaz de medrar e de reducir o paro, e indicou que o obxectivo do Executivo autonómico é “traducir eses datos nun crecemento que chegue a todos, que sexa solidario cos máis débiles, e que sexa, ademais, resistente a posibles turbulencias”.

Na clausura do encontro que o Consello Empresarial para a Competitividade celebrou hoxe en Santiago, o mandatario galego afirmou que a Xunta pon no centro do seu foco as empresas e os emprendedores, posto que son axentes de creación de riqueza e de emprego. A eles se dirixe, indicou, un conxunto de políticas destinado a “derribar as barreiras burocráticas, a fomentar a saída ao exterior dos negocios e a atraer a Galicia novos investimentos”.

Nese marco situou a Lei do Emprendemento e da Economía Competitiva de Galicia, que elimina barreiras burocráticas e permite abrir un negocio en 24 horas, e establece, ademais, catro rebaixas fiscais para aqueles que decidan facer realidade un proxecto empresarial ou ampliar o que xa teñen.

O presidente autonómico destacou, así mesmo, o empeño da Xunta por fomentar a internacionalización empresarial con programas de apoio que abarcan desde o primeiro diagnóstico e os avais ata o asesoramento sobre o terreo. Segundo subliñou, esta aposta está a dar froitos, e o volume das exportacións medrou máis dun 10% no que vai de ano e supuxo un 37% do PIB de Galicia, o que sitúa a Comunidade a catro puntos de Alemaña.
Competitividade inherente a todos os sectores.

Xunto con isto, Alberto Núñez Feijóo resaltou a necesidade de desenvolver a competitividade da economía como un “vector transversal“ e afirmou que aí xurde a Estratexia de Especialización Intelixente RIS 3 como “a folla de ruta para consolidar a innovación como ferramenta inherente a todos os sectores da economía”.

Destacou que este documento, aprobado polo Goberno galego a pasada semana, responde en parte ás exixencias da Unión Europea para que Galicia obteña 2.700 millóns de euros de fondos estruturais, pero, sobre todo “contén as claves que marcarán o noso futuro innovador”.

Trátase, explicou, de mobilizar 1.600 millóns de euros ata 2020 en innovación, eficiencia enerxética e competitividade das pemes, “reforzando os nosos sectores estratéxicos e impulsando outros que deberían selo, como a nanotecnoloxía ou a aeronáutica”. Na súa intervención, o titular da Xunta expresou a vontade do Executivo de facer da galega “unha economía aberta”, o que o levará a concentrar esforzos o próximo ano na captación de investimentos.

Sinalou que a Autonomía ten capacidade suficiente para converterse na plataforma loxística do sur de Europa e, por ese motivo, avanzou que se activará un programa de medidas que permitirá mobilizar 150 millóns en grandes investimentos, na activación dun novo fondo de capital risco, en préstamos, avais, e na posta en valor do solo industrial.

O aval da responsabilidade

Alberto Núñez Feijóo puxo en valor a traxectoria de responsabilidade que avala o Goberno galego, o principio que lle levou a anticiparse no cambio de rumbo da política económica e que fai posible hoxe que a nosa Comunidade estea “nunha mellor posición que o resto das autonomías para iniciar a senda do crecemento”.

Salientou o esforzo realizado pola Xunta para dotar de solvencia as contas públicas e subliñou que o resultado é que hoxe Galicia cumpre cos obxectivos de déficit; que está entre as comunidades que menos aumentaron a débeda pública e agora incluso a reduce; que é das poucas con capacidade para cofinanciar programas estatais e europeos de innovación; que é a única que non se viu obrigada a acudir a ningún dos mecanismos de financiamento e liquidez do Goberno central; e que, grazas a esa estabilidade financeira, pode manter e mellorar os seus servizos públicos.

“Cremos que estamos no bo camiño e así nolo mostran os indicadores”, afirmou o mandatario galego, quen sinalou que as exportacións, a evolución do PIB, a confianza empresarial, o índice de produción industrial e mesmo a porcentaxe de desempregados “manteñen un diferencial positivo con respecto ao conxunto do Estado”.