martes, 7 de abril de 2026
Os peregrinos que cheguen á última etapa do Camiño Francés a Santiago poderán ver a placa conmemorativa do Ano Dual España-Xapón. A directora de Turismo de Galicia, Nava Castro Domínguez, e o embaixador de Xapón en España, Satoru Satoh, inauguraron o monolito no miradoiro do Monte do Gozo que conmemora os 400 anos de relacións entre ambos os países.
Entre os anos 2013 e 2014 celébrase o Ano Dual España-Xapón, que conmemora a chegada a España no ano 1614 da primeira delegación diplomática de carácter oficial enviada por Xapón a España, que saíu de Sendai en outubro de 1613. A delegación, que recibiu o nome de Embaixada Keicho. Este feito ten pasado á historia por tratarse dun dos máis importantes acontecementos nas relación bilaterais entre España e o país nipón.
No acto de inauguración do monolito estiveron presentes tamén o director xeral de Patrimonio do Goberno de Castela e León; a presidenta da Deputación de León e o alcalde de Santiago.
A directora de Turismo de Galicia resaltou, en declaracións aos medios, o feito de que o Camiño de Santiago e o Camiño de Kumano, ambos con declaración de Patrimonio da Humanidade pola UNESCO, están irmandados. De igual modo, explicou que o monolito que hoxe se inaugura é un xeito de agradecer a presenza da Súa Alteza Real o Príncipe Naruhito en Galicia este mesmo ano. Así como que Turismo de Galicia visitará o país nipón en breve e os representantes institucionais terán ocasión de percorrer varios tramos do Camiño Kumano Kodo. De igual modo, avanzou que se traballa desde a Xunta de Galicia, a través de Turismo de Galicia, na organización en 2014 dunha semana de Galicia en Xapón.
Pola súa banda, o embaixador de Xapón en España explicou que esta conmemoración do Ano Dual acadará gran relevancia para as relacións entre ambos os países. Satoru Satoh comentou tamén que el mesmo está a realizar algúns tramos do Camiño de Santiago, que comezou en León; e ao tempo, o embaixador de España en Xapón percorre o Camiño Kumano Kodo. Este é un xeito de intercambiar a experiencia e a espiritualidade das dúas peregrinacións, indicou Satoru Satoh.
Turistas e peregrinos xaponeses en Galicia
Xapón é o principal mercado turístico asiático de Galicia. Con preto de 9.800 viaxeiros aloxados nos establecementos hoteleiros da comunidade en 2012, Xapón representa o 1,3% do total do turismo internacional recibido en Galicia.
En termos dinámicos, o mercado xaponés rexistrou en 2012 un incremento importante dos seus niveis de demanda, superando nun 23% a cifra de viaxeiros e nun 9% o nivel de pernoitas do anterior ano 2011.
No Camiño de Santiago, Xapón é o segundo mercado asiático por detrás de Corea. Con 860 peregrinos rexistrados no pasado ano -cifra correspondente ao número de Compostelas expedidas pola Oficina do Peregrino supón o 1% do total de peregrinos estranxeiros chegados a Galicia. Un de cada cen peregrinos estranxeiros que chega a Galicia procede do país nipón.
Foi presentada a novena edición do Festival Clasclás que, baixo lema de 'Paixón', se vai celebrar, do 20 ao 27 de xuño, en Vilagarcía de Arousa, cunha ambiciosa programación que aposta pola vangarda e a ciencia. Así, este certame convértese nunha das grandes citas internacionais da música clásica, cunha programación que abrangue desde a excelencia da Orquestra Sinfónica de Galicia e da música de cámara ata o virtuosismo de solistas chegados de diferentes partes do mundo. O evento inclúe a celebración dun 'concerto inmersivo' para conmemorar a eclipse solar, que terá lugar en agosto.
O presidente da Xunta destacou que 'as medidas fiscais aprobadas polo Goberno galego e consolidadas dende o ano 2022 permitirán a cada contribuínte da comunidade aforrar unha media de 476 euros na declaración da renda'. Así mesmo, lembrou que na campaña deste ano 'seguen vixentes as medidas de alivio fiscal' postas en marcha pola Administración autonómica nos últimos anos. Así, os contribuíntes galegos volverán aplicar a tarifa deflactada nos tres primeiros tramos autonómicos do IRPF no ano 2023 e a rebaixa do primeiro tramo e do incremento dos mínimos persoal e familiar.
