martes, 3 de noviembre de 2026
A conselleira do Medio Rural e do Mar, Rosa Quintana, asistiu á xuntanza da Comisión do Mexillón na que se avaliou a situación do episodio de biotoxinas mariñas que afecta a Galicia e outras circunstancias relacionadas co sector mexilloeiro. Tras a reunión, a titular de Medio Rural e Mar insistiu en que o sistema de control de biotoxinas do Instituto Tecnolóxico para o Control do Medio Mariño está funcionando moi ben e destacou a profesionalidade do sector, que tamén fai os seus propios controis, co cal, sinalou, a cadea está funcionando perfectamente.
Rosa Quintana lembrou que o Intecmar é un referente a nivel europeo e internacional que naceu con dous obxectivos fundamentais. Por unha banda o de garantir a saúde do consumidor e pola outra, traballar en beneficio dos produtores. Neste sentido, sinalou a conselleira, está dando mostras de que funciona, xa que se evitou que chegase produto con biotoxinas ao consumidor e ademais nestes momentos séguese traballando intensamente, facendo mostraxes con moitísima frecuencia para garantir sempre o bo estado dos nosos produtos para que os consumidores sigan apostado por eles. Explicou ademais que se realizará o seguimento tanto das condicións oceanográficas como das analíticas para que os polígonos de mexillón e os bancos marisqueiros estean pechados o menor tempo posible.
En canto á situación e ás consecuencias da marea vermella, Rosa Quintana explicou que a situación é de certa estabilidade e que de momento non podemos falar de perdas económicas, porque a toxina é un organismo que pode aparecer de xeito natural na auga e que non lle provoca ningún dano ao molusco. Malia todo, indicou que, de ser necesario, se adoptarán medidas como a de aumentar o número de cordas nalgunhas bateas para que non se perda a produción e se poida proceder ao seu desdobre de ser necesario. Asemade, insistiu en que a marea vermella é un proceso natural e habitual e que todos os produtores están acostumados a que exista e a convivir con ela.
Neste caso, lembrou que a toxina apareceu dunha maneira moi virulenta e moi rápida e que afectou inmediatamente, non só a polígonos de mexillón, senón tamén a bancos marisqueiros. Non obstante, insistiu unha vez máis en que os produtos adquiridos polos cauces legais de comercialización teñen garantidas as súas condicións hixiénico-sanitarias porque están amparados polos controis.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur. De feito, destacan os altos rexistros acadados entre os días 9 e 15.
A Xunta de Galicia puxo en marcha a campaña de inmunización fronte á gripe e a COVID, que este ano incorpora como principais novidades a extensión da vacina antigripal de alta carga ás persoas de 65 a 69 anos e a ampliación do proxecto piloto de vacinación nos colexios a 75 centros educativos. O inicio oficial tivo lugar nun acto nas residencias de maiores e centros de discapacidade, o colectivo polo que arranca tradicionalmente a campaña debido á vulnerabilidade deste grupo fronte ás infeccións respiratorias.
