Notas de prensa

Feijóo apela á defensa dun mercado comunitario igualitario para os produtos do mar

O presidente da Xunta, Alberto Núñez Feijóo, apelou á defensa dun mercado comunitario igualitario para os produtos do mar que garanta o futuro e a competitividade do sector conserveiro europeo, español e galego. Fíxoo no marco da inauguración da VI Conferencia Mundial do Atún, que se celebra entre hoxe e mañá na cidade de Vigo e na que participan preto de 300 expertos e directivos de empresas radicadas nunha trintena de países, que concentran o 90% da produción mundial de conservas de pescados e mariscos.

Na súa intervención, o presidente galego sostivo que “o espírito de defensa dos “intereses comúns” e de “mellora da competitividade dos nosos produtos” debe ser o que “guíe os pasos” das políticas da Unión Europea para garantir o futuro do sector conserveiro, “impedindo a entrada de novos axentes no escenario europeo” cando a actividade transformadora ou comercializadora non se realice “en igualdade de condicións” que as dos propios Estados membros.

Feijóo advertiu que acordos de libre comercio entre a Unión Europea e terceiros países para a comercialización dos seus produtos pesqueiros e conserveiros no ámbito comunitario “xeran alarma” e conducen cara a “un terreo de xogo que fai perigar a viabilidade do sector”, ao non dispoñer a industria atuneira europea dos mesmos instrumentos de competitividade que as industrias foráneas, o que, dixo, “xera graves disfuncións”.

Nesta liña afirmou que, a pesar de que Europa non se pode pechar a unha economía globalizada, tampouco os estados membros “podemos renunciar a defender a competitividade dos nosos produtos”. Por iso, engadiu, desde o Goberno galego “estamos dando a batalla na defensa dun mercado en igualdade de condicións hixiénico sanitarias, sociais e ambientais e sen competencias desleais” que evite a “facilidade na entrada na UE” de produtos do mar procedentes de terceiros países que dispoñan de vantaxes competitivas ou da exención de aranceis.

“Defendemos e sostemos a necesidade de que as conservas de atún queden excluídas destes pactos comerciais xa que –considerou- se países foráneos logran vantaxes para introducir a súa produción no mercado comunitario, a Unión Europea, ao dar consentimento e amparo a estas prácticas, estaría poñendo en grave risco a supervivencia da súa propia industria atuneira e conserveira”.

O mandatario autonómico reclamou, pois, o “estrito cumprimento” de todas as normativas como unha “exixencia irrenunciable” da UE e os seus estados para permitir a entrada de produtos da pesca en conserva procedentes destes terceiros países. “Desde o Goberno galego apelamos á unión de esforzos na defensa dun mercado comunitario único e igualitario do atún e de todos os produtos do mar”, enfatizou, incidindo na importancia e relevancia da industria atuneira a nivel comunitario, español e galego.

España e Galicia, á cabeza do sector

España é o primeiro produtor de conservas e semiconservas de pescados e mariscos da UE e o segundo a nivel mundial, sendo a comunidade galega pioneira na produción, con máis do 85% do volume producido no conxunto do Estado. Ademais, as conservas de túnidos son o principal produto elaborado pola industria conserveira española, representando máis do 68% do total do volume e acadando o 60% do seu valor.

O xefe do Executivo galego destacou que o sector transformador de conservas e pescados e mariscos contribúe ao PIB nun 2,8% e xera o 6,5% do emprego industrial en Galicia, sendo capaz de liderar o crecemento de comarcas enteiras da nosa terra e de auspiciar o despegue de enclaves portuarios como o da Pobra do Caramiñal, líder autonómico en tráfico de túnidos.

Ante estes datos que avalan a importancia do sector conserveiro e atuneiro, Feijóo congratulouse de decisións como a adoptada pola Comisión Europea en xaneiro deste ano, ao ampliar o abastecemento de lombos de atún libres de arancel ata as 22.000 toneladas. Unha decisión que considerou “fundamental” para garantir a competitividade desta industria e “imprescindible” para preservar a importante dimensión socioeconómica dun sector que xera 15.000 empregos directos en España, deles, o 85% en Galicia.

Feijóo rematou a súa intervención subliñando que esta VI Conferencia Mundial do Atún é o escenario idóneo para reflexionar e abordar os retos e desafíos desta industria e amosouse confiado en chegar a acordos que permitan definir unha folla de ruta para traballar no futuro do sector.