Notas de prensa

Máis de 41.000 persoas colaboran nas ONG de desenvolvemento galegas

O voluntariado é unha das principais formas de participación nas organizacións solidarias. Nas 46 ONGD da Coordinadora, son 1.928 as persoas que colaboran a diario co obxectivo de transformar o mundo nun lugar xusto, igualitario e libre. Unha cifra que creceu o último en case 300 persoas (1.670 en 2012). Por outra banda, as persoas que colaboran como socias nas ONGD galegas son algo máis de 39.000.

Nas ONGD tamén traballan persoas que manteñen un vínculo laboral coa organización. Son profesionais con formación universitaria cualificada que participan na xestión e seguimento de proxectos tanto en Galicia como nos países onde se desenvolven iniciativas de cooperación internacional e de acción humanitaria. Hoxe, as ONGD teñen contratadas 82 persoas en Galicia e 9 no estranxeiro. Estas cifras son menores cás de 2010, momento no que había 107 contratos en Galicia e o número de persoas inscritas no Rexistro de Cooperantes de Galicia superaba a centena.

Das 82 persoas que traballan en Galicia, unha gran maioría son mulleres (61) pero tamén son elas as que teñen unha situación laboral máis fráxil: unha maior porcentaxe de contratos temporais e a tempo parcial cós homes. Por este motivo, a Comisión de Xénero da Coordinadora ten previsto poñer en marcha nos próximos meses un plan para reducir a fenda de xénero no interno das organizacións. Nos últimos anos, avanzouse moito nestes aspectos e, por exemplo, a participación de mulleres nos equipos directivos creceu de forma clara. Aínda así, hoxe hai máis homes que mulleres nos postos de presidencia (26 fronte a 20, respectivamente) malia que elas teñen máis presenza nas organizacións.

Outro elemento fundamental que permite o traballo das ONGD son as contrapartes: as organizacións sociais nos países do Sur. Estas organizacións son as que coñecen a realidade local, as necesidades e as formas axeitadas para traballar en cada comunidade. A maioría tamén son organizacións formadas por persoal contratado, voluntariado e base social. E son o motor indispensable para a transformación da realidade. En Galicia, as ONGD traballan con máis de 40 contrapartes de América Latina e �frica.