viernes, 24 de abril de 2026
A Consellería de Cultura, Educación e Ordenación Universitaria a través da Fundación Pública Galega Camilo José Cela inaugura unha nova mostra anual sobre a figura do premio Nobel padronés na Biblioteca de Galicia sita na Cidade da Cultura. Esta exposición vén substituír á exposición sobre La familia de Pascual Duarte e forma parte do acordo de colaboración entre a Fundación e a Biblioteca de Galicia para difundir á figura e a obra de Camilo José Cela mediante a realización de actividades e exposicións conxuntas, a través da cesión de exemplares ao Gaiás.
Nesta nova mostra, que xa está aberta ao público, pódense contemplar exemplares da biblioteca de Cela relacionados con Galicia dende tódolos puntos de vista: literatura, historia, lingua, ciencias sociais, guías turísticas, biografías, arte e incluso exemplares da hemeroteca da Fundación. A sección de literatura é, sen dúbida, a más completa, e na que están representación os autores máis importantes de cada xeración, -incluíndo en moitos casos dedicatorias a CJC dos seus autores. Escritores do prerexurdimento como Xoán Manuel Pintos -coa súa obra clave 'A gaita galega'-, e Francisco Añón; o Rexurdimento con Rosalía de Castro, Eduardo Pondal e Curros Enríquez; a literatura do século XX coas Irmandades da fala -Ramón Cabanillas-, o Grupo Nós con Vicente Risco ou Ramón Otero Pedrayo-, autores como Castelao, Rafael Dieste e Luis Pimentel; literatura de posguerra con Aquilino Iglesia Alvariño, Álvaro Cunqueiro ou Celso Emilio Ferreiro; o exilio representado por Luis Seoane e Eduardo Blanco Amor; e a literatura galega durante a democracia, con exemplares de Xosé Luis Méndez Ferrín, Carlos Casares, Manuel Rivas, Alfredo Conde ou Roberto Vidal Bolaño.
Destaca tamén un conxunto de primeiras edicións da editorial Galaxia dos anos 50 e 60, moitas de elas tamén dedicadas polos seus autores. Recóllense nesta mostra tamén obras de autores galegos en lingua castellana como Concepción Arenal, Emilia Pardo Bazán, Valle-Inclán ou Gonzalo Torrente Ballester ou obras representativas de autores non galegos pero relacionadas con Galicia como Ángeles de Compostela de Gerardo Diego ou 'Poemas galegos' de Federico García Lorca.
Entre o resto de materias destaca a obra Historia de Galiza, dirixida por Ramón Otero Pedrayo, e traballos de José Filgueira Valverde, Xosé María Álvarez Blázquez, José María Castroviejo ou Manuel Chamoso Lamas. Dentro dos exemplares da hemeroteca que se poden contemplar nesta mostra cabe destacar os 'Semanario político, histórico y literario de La Coruña' (1809), publicación seriada galega máis antiga que se conserva na Fundación, ou un exemplar da revista Nós de 1930. Esta mostra ten carácter anual polo que poderá visitarse ate finais do primeiro semestre de 2014.
O festival Play-Doc desenvolverá do 29 de abril ao 3 de maio en Tui a súa 22ª edición para conectar memoria, creación actual e futuro do cinema galego e internacional. No ámbito galego, a programación desta edición volve ocupar un lugar central cunha Competición Galicia que reúne títulos de Xiana do Teixeiro, Roi Fernández, Xacio Baño, Adrián Canoura, Cristina Souto, Hugo Amoedo, Bea Lema, Berio Molina e Chloé Lecci López, entre outras voces. O festival mantén, ademais, a sección Sombras, dedicada nesta ocasión á recuperación da figura de Rafael Luca de Tena, e unha nova edición de Coming Soon, espazo no que se presentarán proxectos galegos en desenvolvemento. O Play-Doc continúa a reforzar a súa función de escaparate e plataforma de difusión para a produción audiovisual do país e como punto de encontro para novas obras e profesionais.
O número de persoas en Galicia que le ocasional ou habitualmente na nosa lingua medra en case nove puntos ata acadar o 72 %, isto é, sete de cada dez galegos. Ademais deste incremento do 13 por cento na lectura ocasional ou habitualmente en galego con respecto ao ano anterior, o estudo de 2025 tamén revela a consolidación dunha Galicia lectora, reflectida no sindicadores que sinalan que o 96,5 % da poboación maior de 14 anos le en calquera medio e soporte, o que sitúa a nosa Comunidade nun 1,4% por enriba da media de España. Ademais, o 70 % destas lecturas son de libros.
