Notas de prensa

A ecoetiqueta garantirá que os produtos galegos cumpren criterios ambientais

O conselleiro de Medio Ambiente, Territorio e Infraestruturas, Agustín Hernández, avanzou en Vigo que a Xunta de Galicia aprobará proximamente o decreto de aplicación da ecoetiqueta, co que se garantirá que os servizos e os produtos de Galicia cumpren uns criterios ambientais selectivos, transparentes e esixentes.

Hernández fixo este anuncio durante a súa intervención no IV Congreso Galego de Medio Ambiente e Saúde, onde indicou que o novo decreto autonómico para a aplicación da ecoetiqueta permitirá adaptarse á lexislación europea e estatal e establecer o procedemento a seguir por aquelas empresas que desexen acollerse a este sistema de certificación ambiental.

Manifestou que o decreto contribúe a outorgar un maior protagonismo á ecoetiqueta nos procesos de contratación pública, xa que aquelas empresas que presenten este certificado terán un valor engadido e estimularase, mediante un efecto arrastre, o reverdecemento do mercado.

Neste senso, facilita a elección aos consumidores e usuarios que desexan reducir os efectos ambientais adversos e contribuír así a unha utilización eficaz dos recursos. A modo de exemplo, citou produtos, como os téxtiles, ou servizos, como os turísticos, que efectivamente poden ter maior ou menor impacto sobre o medio ambiente.

O conselleiro tamén destacou que, para facilitar o cumprimento da normativa, é importante tamén simplificala na medida do posible. Dende a Xunta apóstase por camiñar na liña do que fai o anteproxecto de Lei de Avaliación de Impacto Ambiental do Ministerio de Medio Ambiente dada a coñecer recentemente e que axilizará os trámites para os promotores dos proxectos que precisen deste requirimento ambiental.

Recoñeceu que o labor de control e inspección ambiental é responsabilidade das administracións e dende a autonómica cóntase co Laboratorio de Medio Ambiente que garante os parámetros de calidade da auga, do aire ou o ruído, aspectos todos que afectan directamente á saúde.

Un dereito a protexer

O conselleiro incidiu en que o medio ambiente é un factor básico para a saúde e o benestar xeral da cidadanía. Engadiu que non se trata dun luxo, senón dun dereito a protexer; polo tanto “entre todos debemos facer todo o posible para que a actividade humana non dane o medio ambiente”, declarou.

Sinalou que a boa saúde do medio repercute directamente no benestar, por iso as administracións públicas deben asumir a planificación dos residuos, da xestión da auga ou do territorio con rigor e realismo, pero sobre todo coa sostibilidade ambiental como condición imprescindible.

Por último, engadiu que son moitas as accións que se poden levar a cabo para promover a sostibilidade ambiental, xa sexa a nivel individual ou colectivo, e apostou pola economía e o emprego verde como o mellor xeito para mellorar a competitividade e a internacionalización da Comunidade. Para darlle un pulo a este obxectivo, estase a ultimar unha convocatoria das subvencións para melloras ambientais destinadas a pemes (pequenas e medianas empresas) e entidades sen ánimo de lucro, que suporá 3,6 millóns de euros en axudas.