Notas de prensa

Galicia oferta 200 prazas de mestre e outras 22 de inspectores de educación

O presidente da Xunta subliñou que, coa convocatoria de 222 novas prazas no eido educativo, Galicia se sitúa como a segunda comunidade autónoma “onde hai unha oferta pública de emprego en educación, e como a primeira comunidade en relación número de profesores e número de alumnos; en consecuencia –aseverou-, Galicia, hoxe por hoxe, é a comunidade autónoma con máis prazas en oferta pública de emprego de educación en termos comparativos”.

Na rolda de prensa posterior ao Consello da Xunta, que hoxe deu luz verde á convocatoria destas prazas, o mandatario autonómico explicou que se trata de 200 novas prazas de mestre, 50 na especialidade de mestre infantil, 50 para inglés, 50 para pedagoxía terapéutica e 50 para audición e linguaxe, ás que hai que sumarlle, ademais, outras 22 prazas no corpo de inspectores de educación.

Feijóo remarcou que con esta convocatoria se busca impulsar o plurilingüismo no ensino público e a atención á diversidade do alumnado, “converténdonos nunha das comunidades autónomas coas taxas máis baixas de temporalidade na educación pública”.

“Somos a segunda comunidade autónoma que sacamos unha oferta pública de emprego no ámbito da educación, pero somos a primeira comunidade autónoma no número de prazas en función do número de mestres e do número de alumnos”, recalcou o presidente da Xunta, lembrando que xestionar “con eficiencia” permite, a pesares da crise, “facer ofertas públicas de emprego”, como esta aprobada hoxe ou como a xa aprobada a finais do pasado ano no ámbito da sanidade.

Redución do absentismo laboral

Doutra banda, Alberto Núñez Feijóo asegurou hoxe que a Xunta acadou un aforro de 26 millóns de euros en 2012 como consecuencia da redución do absentismo laboral na Administración. O presidente galego cualificou de “notable e histórica” a diminución de baixas laborais dos empregados públicos que se constata en todos os ámbitos: o docente, o sanitario, o da xustiza, o dos servizos sociais e o da Función Pública en xeral. “Temos conseguido aforros por 26 millóns de euros tan só no ano 2012 como consecuencia de que o número de baixas laborais dos empregados públicos se ten reducido dunha forma histórica. Un 25,6% de redución do absentismo laboral na función pública e un 24% de redución do absentismo laboral no Servizo Galego de Saúde”, explicou o presidente.

Para Alberto Núñez Feijóo estas cifras reflicten “cada vez un maior grao de compromiso dos empregados públicos cos cidadáns”. Segundo dixo, o menor absentismo tradúcese nunha maior produtividade e a maior produtividade “significa, sen dúbida, unha maior responsabilidade e unha maior eficiencia dos servizos públicos para que os cidadáns vexan que, a pesares da crise económica, os seus impostos cada día se aplican con maior rigor”.

Feijóo salientou que esta evolución “ tense intensificado” desde que no mes de marzo se comezara a aplicar a Lei de medidas temporais en materia de emprego público. Segundo o informe que a Consellería de Facenda presentou hoxe no Consello da Xunta, o ano pasado iniciáronse un total de 5.500 baixas menos (un 29,2% menos) que en 2011 no ámbito da Función Pública. No ámbito do Sergas, iniciáronse 9.000 baixas menos (un 36% menos). Se se colle como referencia o mes de decembro de 2012, a redución de baixas iniciadas na Función Pública foi do 37%, mentres que no Sergas foi do 40%.

O presidente da Xunta lembrou que as cifras de absentismo xa se veñen reducindo desde 2009 (cun 41% de redución ata 2012), cunha porcentaxe que se sitúa no 3,19% no ámbito da Función pública (con 60.000 traballadores) e no 3,99% no ámbito do Servizo Galego de Saúde (que conta con 30.000 empregados). Feijóo destacou que estes datos corroboran que o grao de absentismo laboral na maioría das empresas privadas é maior que o rexistrado na Xunta de Galicia en todos os seus ámbitos, e comprometeuse a “seguir traballando” para manter estas ratios.