Notas de prensa

Sogama presenta o portal educativo Caderno Verde

No seu empeño por dar un paso adiante no ámbito da educación ambiental dos escolares galegos, Sogama, co apoio da Consellería de Medio Ambiente e a colaboración de Botóns (Portal Galego de Educación), lanza unha páxina web que, baixo o título “Caderno Verde” e o dominio www.cadernoverde.com, pretende ser un recurso didáctico co que introducir, de forma transversal, as boas prácticas ambientais nas distintas disciplinas que conforman o deseño curricular do ensino Primario.

Co lema “Educación para un futuro sostible”, a xestión dos residuos urbanos en xeral, e o cometido desta empresa pública en particular, constitúen os eixes centrais sobre os que xirarán as distintas actividades recollidas nesta plataforma web. O principio dos tres erres (redución, reutilización e reciclaxe) e o labor de Sogama como complemento ás mesmas cobrarán especial protagonismo nun contexto marcado pola coidadosa elección dos contidos, baixo criterios pedagóxicos, e o traballo no ámbito das actitudes cara á problemática que, a día de hoxe, representa a inxente cantidade de lixo producido e a implicación da cidadanía na súa xestión, tendo en conta que é precisamente a prevención, o consumo racional e a activa participación nos mecanismos de recollida selectiva, os piares que deben sustentar a colaboración da poboación; un xesto absolutamente necesario para garantir o posterior reciclado e, polo tanto, o notable aforro de enerxía e materias primas que este trae consigo.

CONTIDOS

www.cadernoverde.com irase nutrindo quincenalmente con diferentes unidades didácticas pensadas de forma específica para o traballo dos pequenos nas escolas, pero tamén para reforzar a educación no seo das familias, tendo en conta que a conexión entre ambos escenarios fará posible un labor produtivo no ámbito da educación integral dos pequenos, que contarán cunha sólida formación de base que lles permitirá actuar e comportarse como cidadáns comprometidos co coidado do medio ambiente, contribuíndo á creación dun futuro mellor para todos.

A iniciativa, que pretende conxugar coñecementos e diversión, nútrese con diversos personaxes encargados de divulgar os contidos, ao tempo que conta con ilustracións orixinais pensadas especialmente para esta etapa educativa e nas que prima a sinxeleza, o colorido, a empatía cos intereses dos nenos e nenas, e a comprensibilidade.

Aloia, Brais, Tomé e Mireia, xunto co avó Celso e o can Cirilo, son “Os amigos de Vilaverde”, quen acompañarán aos escolares nunha nova aventura de aprendizaxe ambiental á que tamén se unirá a coñecida Familia Trebón, protagonista da serie de videocontos do “Planeta Verde” de Sogama.

O obxectivo é que a dimensión ambiental se evidencie en todas e cada unha das materias que cursan os escolares: desde coñecemento do medio ata matemáticas e educación artística, pasando por lingua galega, castelá e estranxeira. É por isto que cada unidade didáctica estará conformada por fichas nas que se incluirán exercicios prácticos cos que contrastar e avaliar o grao de aprendizaxe adquirido polos usuarios, insistindo naquelas cuestións que poidan resultar máis arduas e confusas.

E é que o medio ambiente como tal non debe ser un área de coñecemento illada e desconectada do resto das materias obxecto de estudo porque, en realidade, éo todo, configurando o escenario no que se desenvolven as nosas vidas e no que os cativos se van formando progresivamente co obxectivo de converterse en adultos responsables desde todas as dimensións, incluída a ecolóxica, debendo esforzarse en preservar a integridade do seu contorno vital, o que fará posible o benestar e a calidade de vida.

Aínda que as unidades didácticas estarán dispoñibles en formato dixital, os que así o desexen poderán imprimilas en soporte papel, non precisando ser grampadas nin encadernadas, resultando suficiente introducilas nun cartafol na que as distintas áreas de coñecemento poden identificarse con códigos de cores.

O proxecto divulgarase a través das páxinas web de Sogama e Botóns: www.sogama.es e www.botons.eu.