Notas de prensa

Unha concentración obriga a suspender o claustro da USC

A Mesa do Claustro acordou reunirse proximamente para fixar unha data para continuar a sesión. O estudantado mostraba o seu rexeitamento ás reformas educativas mentres que o PAS demandaba “ canles efectivas de negociación” coa Xerencia da Universidade para a aplicación do Real Decreto de medidas para garantir a estabilidade orzamentaria e de fomento da competitividade e da Lei de Orzamentos Xerais do Estado para 2012.

O reitor mostrou o seu agradecemento aos membros do Claustro que asistiron á reunión e que “ soportaron o atropello e insultos que, para a institución e para eles e elas como representantes nese órgano de goberno, supuxo un comportamento fóra de todas as normas de respecto ao sistema democrático practicado por un grupo de persoas que, en absoluto, representan o sentir da comunidade universitaria”.

O Claustro reuníase este mércores para debater as Liñas Xerais dos Orzamentos para 2013 e da Programación Plurianual para os vindeiros dous anos, ademais de coñecer o informe de seguimento da planificación estratéxica 2011-2020 correspondente ao presente ano e ratificar a proposta do Consello de Goberno de tres novos nomeamentos honoris causa da USC.

Nota de prensa dos Comités Abertos de Facultade:

Os Comités protestamos contra o goberno da USC e os seus recortes participando dun Claustro que, finalmente foi suspendido por vontade da comunidade universitaria. Erguéndonos do mesmo e uníndonos a esta por entender que este goberno se atopa absolutamente deslexitimado para exercer como tal na nosa Universidade a día de hoxe.

O Responsponsábel de Campus e claustral, Brais Pedreira, declarou que “era inevitábel que isto sucedera nunha Universidade que goberna a Xunta e cuxos organismos están absolutamente baleirados de autonomía” así mesmo, tamén indicou que “o goberno da USC é o brazo executor do señor Núñez Feijóo”.

Cando os Claustrais dos Comités se ergueron para acompañar ás eaos compañeiras e compañeiros que se atopaban protestando fóra do mesmo foilles impedida a saída. Ademais foilles impedida a entrada a numerosas/os claustrais que agardaban fóra. Finalmente puideron irrumpir no Claustro os/as compañeiros/as que estaban a berrar contra o desgoberno da Universidade. Tamén dende a nosa organización mostramos un grande descontento pola actitude represiva da USC que mesmo requeriu que os claustrais da nosa organización se tiveran que identificar reiteradas veces.

Neste claustro presentábansenos as liñas xerais de actuación totalmente irreais, e que, despezando un servizo público como é a universidade, a vendían ao mellor postor, chegando a plantexar un ERE encuberto dos PAS e a priorización da investigación privada. Os orzamentos facíanlle camiño á Xunta para recurtar, aínda máis, o investimento.

Finalmente, Brais Pedreira dixo que “esta non é unha acción casual, nós xa vimos advertindo do mal goberno da USC e reiteramos a nosa petición de dimisión da equipa reitoral e do señor Casares, pola súa nefasta actuación.”