viernes, 6 de noviembre de 2026
O director xeral do Instituto Galego de Promoción Económica (Igape), Javier Aguilera Navarro, recibiu en Santiago, en representación da Consellería de Economía e Industria, a membros dunha delegación de empresarios mexicanos da zona de El Bajío, situada no centro do país, no estado de Guanajato, interesados en avaliar posibles acordos e alianzas con centros tecnolóxicos galegos.
O director xeral do Igape recibiu a representantes da Cámara Nacional de la Industria de Transformación (Canacintra), e da axencia de desenvolvemento da cidade de Celaya, que acudiron a Galicia para manter encontros con representantes de centros tecnolóxicos como o CTAG (Centro Tecnolóxico da Automoción de Galicia) e Aimen, na procura de posibles alianzas empresariais ou acordos para a transferencia de tecnoloxía.
No encontro participaron o director xeral da axencia de desenvolvemento de Celaya, Carlos Pérez Chávez, e o presidente de Canacintra nesa cidade, Juan Carlos Rojas, así como representantes dos clusters galegos cos que as entidades que representan están interesadas en establecer posibles acordos para a transferencia de coñecemento, dado que a zona de El Bajío está en pleno proceso de industrialización, especialmente no ámbito sectorial da automoción.
Durante o encontro, Javier Aguilera salientou o interese da Xunta de Galicia e dos empresarios galegos polo mercado de México, tanto polo seu propio potencial como polas posibilidades do Estado como porta de acceso ao inmenso mercado norteamericano. Neste sentido, o director do Igape lembrou que Galicia dispón dunha plataforma empresarial da Rede Pexga en México para facilitar o labor dos empresarios galegos interesados nese mercado e para asistilos no proceso de busca de clientes ou aliados no país.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
