Notas de prensa

Galicia presenta a súa experiencia de compromiso coa xestión eficiente dos servizos públicos

O presidente da Xunta, Alberto Núñez Feijóo, baseouse na experiencia galega para afirmar que “a España das autonomías é viable, fiable e necesaria”, e sinalou que “a autonomía transformou Galicia”, producindo “unha revolución pacífica, na que os galegos despregan enerxías durmidas en todas as ordes”. Así o dixo o xefe do Goberno galego no curso de verán da Asociación de Periodistas Parlamentarios, organizado pola Universidade Rey Juan Carlos I en Aranxuez, onde que afirmou, ademais, que “a cuestión non está no modelo, senón noutros factores alleos, como a cultura de cooperación entre as forzas políticas”.

Na súa intervención, o titular do Executivo referiuse así á superación da Galicia agraria e atrasada, que deu paso ás multinacionais, e destacou tamén que o país recuperou a súa lingua e a súa cultura e fortaleceu “un galeguismo que non busca inimigos dentro nin fóra da comunidade, senón que agrupa en torno a ideais comúns”.

A autonomía foi tamén, explicou, unha ferramenta útil para facerlle fronte ás dificultades económicas, e Galicia soubo “reaccionar a tempo cando a crise aínda era negada tres veces polo Goberno central”. Nese sentido, subliñou que “Galicia foi pioneira en austeridade cando noutras autonomías e no propio Goberno central aínda era xeral a idea de que o gasto público tiña que ser maior e maior”.

Segundo destacou Feijóo, esa actitude permite que hoxe Galicia sexa “a comunidade con menor déficit orzamentario”, mentres que outras autonomías e o mesmo Goberno central se endebedaron “ata límites que agobiaron a Europa”. “Fixemos de formigas cando outros eran cigarras, e grazas a iso, as nosas medidas de axuste puideron ser moito máis suaves que noutras comunidades”, afirmou.

Apuntou que Galicia non ten que pagar o sobrecusto do 2,5% que pagan outras autonomías respecto a Galicia, non tivo que acudir ás medidas excepcionais habilitadas polo Goberno central para o pago a provedores, nin se veu obrigada a baixar os salarios dos empregados públicos ou a facer esforzos para non pechar hospitais e preservar o seu nivel de prestacións públicas.

Un Estado do Benestar máis completo que en tempos de bonanza
Lonxe diso, asegurou que “Galicia está a lograr que, en plena crise económica, o noso Estado do Benestar sexa máis completo que en tempos de bonanza”, con máis educación pública, “ao incorporar os nosos colexios máis ordenadores e máis idiomas”; con máis sanidade pública, “grazas ao impulso de sete grandes infraestruturas hospitalarias” e á redución á metade das listas de espera de pacientes graves; e con máis servizos sociais públicos, “ao crear no que vai de lexislatura máis de 5.500 novas prazas públicas de garderías, residencias e centros de día, máis de todo o que se fixo na anterior lexislatura autonómica”.

Feijóo resaltou que Galicia se anticipou coa súa estabilidade orzamentaria, co que “é a primeira no ránking dos obxectivos do déficit e practica desde hai tempo políticas de austeridade que despois foron inspiradoras para outras administracións”. “Representamos, en suma, un modelo no que se fan ben as cousas, no que a autonomía non é un símbolo para alardear, senón un compromiso coa eficiente xestión dos asuntos públicos”, defendeu.

O modelo autonómico, un ‘chivo expiatorio’.

No seu discurso, o presidente da Xunta observou que o modelo autonómico se está a converter “nun chivo expiatorio da situación española” e sinalou que “as solucións non poden cinguirse á estrutura autonómica”. Nese sentido, lembrou que os tres países intervidos pola UE teñen unha estrutura centralizada, mentres que “un dos principais socorristas da Unión Europea”, Alemaña, ten “unha administración moi complexa na que a toma de decisións obriga a complicados pactos territoriais”.

O xefe do Goberno galego resaltou que “nin o federalismo alemán é un obstáculo para a súa mellor situación, nin o centralismo dos nosos veciños portugueses lles garante a estabilidade e o crecemento”.

Avogou por diferenciar entre os dous modelos autonómicos que funcionan no Estado español, o “de chegada” e o “de partida”, e situou no primeiro á maioría das comunidades, para as cales “a autonomía é unha situación que colma as nosas aspiracións”, mentres que as dominadas pola cultura nacionalista ven nela “unha estación de tránsito”.

Advertiu de que o nacionalismo e as súas consecuencias non deixarían de existir “se borrásemos dun plumazo a estrutura autonómica” e sinalou que os que avogan por esa situación “deberían preguntarse ademais por qué o nacionalismo está de acordo con eles”.

“O nacionalismo busca o privilexio e o Estado das Autonomías equivale á igualdade”, abondou o presidente galego e, fronte a isto, apostou por un “autonomismo cooperativo” , como o edificado por Galicia nestes anos, en liña, dixo, “co que practican as rexións dos países federais europeos”.