Notas de prensa

A figuración fotográfica e a plasticidade da pintura únense na obra de Iago Eireos

A obra plástica do artista lucense Iago Eireos móstrase dende hoxe e ata o 1 de xuño na Casa de Galicia-Delegación da Xunta de Galicia en Madrid na exposición de fotografía/pintura "Umbra Bruna", que reúne pezas nas que a figuración e a narración do medio fotográfico está en comuñón coa plasticidade da pintura, chegando a unha fusión entre o haluro de prata e o pigmento. "A imaxe latente xustapoñer se sobre o soporte pictórico, xerando á primeira vista unha abstracción que contén múltiples realidades", explica o artista.

Na inauguración da exposición interviñeron, ademais do autor, o poeta Miguel �ngel Curiel, tamén prologuista do catálogo da exposición, e o coordinador de Actividades Culturais da Casa, Ramón Jiménez. Eiros falou brevemente do seu traballo de experimentación plástica, que, dixo, dálle un selo propio e unha forma determinada de escribir e narrar na súa obra, que neste caso concreto e con ocasión do 175 aniversario do nacemento de Rosalía de Castro fai referencia á súa obra poética e en especial á súa "Negra Sombra", dende unha visión moi persoal.

Curiel viu pintadas nas obra de Eireos a néboa e sombras en "un expresionismo abstracto que se forxa nunha luz que non pretende iluminar senón proxectar a espiritualidade da imaxe" e "deconstruir a imaxe ata a levar ao máximo silencio de si mesma". "Iago Eireos atrévese a entrever a atmosfera dunha metafísica oral, coas súas imaxes constrúe o silencio dunha narración. Non se revela esta vez a imaxe para ser vista, senón para que remate disolta na alma ou espírito de cada un, na sombra de cada un", aprecia.

"´Umbra Bruna´ é tamén auga onde se disolven os rostros, e a materia vivificada, unha arte moi líquida ligada ás capas da memoria (os espectros imaxinados como manchas de humidade nunha parede ou nun muro vital). �s veces unha follaxe moi densa de imaxes atravesadas pola luz cenital do mundo. Outras veces a transparencia superponse ao invisible", sinala Curiel.

Pola súa banda, Jiménez destacou que Eireos é un artista novo pero cunha frutífera traxectoria creadora, en cuxas obras se fusionan diversas linguaxes plásticas, o que xera múltiples realidades. "É Iago Eireos un recoñecido, malia a súa xuventude, pintor e fotógrafo, con abundante premios e bolsas, e de entre estas destaco a que recibiu en 2006 da Fundación Antonio Gala de Córdoba. Ese mesmo ano gañou o primeiro premio GZ crea 2006, certame galego de novos creadores, na modalidade de fotografía. A obra titulábase ´Umbra Alba´, e era unha fotografía de sombras de figuras proxectadas sobre o pavimento dunha beirarrúa, da que explicou que era un xogo coa luz que a determinada hora do día creaba unha textura plástica no espazo que se vía ante a súa ventá en Romanía mentres estudaba cunha bolsa Erasmus", expuxo.

Así pois, observou, "o tema da sombra é alongado na obra de Iago Eireos, quen valéndose da conxunción de dúas artes, a fotografía e a pintura, é capaz coas súas sombras de sacar á luz a poesía oculta das cousas, esa espiritualidade que habitualmente escapa á superficialidade das nosas miradas".