Notas de prensa

A presidenta do Consello de Informativos de RTVE recolle en Ferrol o VIII Premio José Couso

A presidenta do Consello de Informativos de Televisión Española, Yolanda Sobero, recolle en Ferrol o VIII Premio José Couso de Liberdade de Prensa que organizan o Colexio Profesional de Xornalistas de Galicia (CPXG) e o Club de Prensa de Ferrol, en colaboración coa Obra Social ‘la Caixa’.

No transcurso dunha rolda de prensa no Concello da cidade departamental, Sobero afirmou que para eles é “unha honra recibir este premio por ser na memoria do xornalista José Couso, que foi asasinado por ser unha testemunha molesta” e, tamén “por ser un galardón á liberdade de prensa outorgado dende dentro, polos propios profesionais da información”. Sobero sinalou que este recoñecemento anima aos xornalistas de TVE a mellorar a televisión como servizo público á cidadania e aínda que a situación sexa adversa, non se deben descoidar os valores deste servizo público cuxas prioridades son: a veracidade, imparcialidade e pluralismo.
Neste sentido, a presidenta do Consello declarou que seguen a traballar pola defensa destes valores, polo que están a promover unha declaración dos profesionais da información de CRTVE na que se defende a información como un dereito constitucional dos cidadáns, e se manifesta o compromiso dos comunicadores para a elaboración da información con criterios profesionais como a pluralidade, a independencia e a veracidade. Para isto, desde o Consello defenden “a despolitización da dirección dos servizos informativos”, polo que reclaman que a elección do presidente da corporación sexa por consenso das forzas politicas.

No mesmo acto, o decano do CPXG, Xosé Manuel Pereiro, manifestou que “o Consello de Informativos de TVE é un organismo que garante a liberdade de expresión e os dereitos dos profesionais diante das presións que se exercen tanto dende arriba coma dende abaixo”. Ademais, Pereiro trasladoulle aos representantes do Consello a noraboa en nome da organización.

No acto tamén estiveron presentes o presidente do Club de Prensa de Ferrol, Xan Morales Somoza, e o delegado xeral de “la Caixa” en Galicia, Marc Arthur Benhamou, quen manifestou o compromiso da entidade coa defensa da liberdade de prensa e a satisfacción pola colaboración co Premio José Couso.

Yolanda Sobero e o Consello de Informativos de TVE

Nacida en Corao, Asturias, en 1959, Yolanda Sobero é doutora en Ciencias da Información pola Universidade Complutense de Madrid e Magíster en Estudios Amerindios. En 1982 entra a formar parte dos servizos informativos de TVE. Nesta canle, ten exercido as correspondencias en Moscova e Bos Aires, ademais de ser enviada especial a Tinduf, Chechenia, Xeorxia, Kosovo e Serra Leona, entre outros lugares. Entre 1990 e 2004 foi coordinadora da �rea de Información Internacional dos Telediarios Fin de Semana e ese mesmo ano se incorpora ao programa En Portada. Recentemente, recibiu xunto con Susana Jiménez Pons o I Premio de Xornalismo Colombine pola reportaxe Feminicidio S.A.

O Consello de Informativos de TVE é un órgano de participación destinado a garantir o control interno, a defensa da independencia profesional, a promoción da independencia editorial e o amparo dos profesionais da información da Corporación RTVE. É unha conquista histórica dos profesionais de RTVE, recoñecidos pola Lei 17/2006, que configura o servizo da radio e televisión estatais como un servizo esencial para a vida democrática.

En setembro do pasado ano o Consello de Informativos de TVE rexeitou e reprobou a decisión adoptada polo Consello de Administración para que os seus membros tiveran acceso directo ao sistema de traballo da redacción de informativos. Ante este pronunciamento, o Consello de Administración de RTVE revocou a súa decisión.

Hai poucas semanas, o actual goberno aprobou un real decreto que permite nomear ao presidente de RTVE por maioría absoluta, eliminando a necesidade de facelo mediante a maioría cualificada. O Consello de Informativos de TVE mostrou a súa preocupación xa que considera que fai perigar a independencia da corporación e actualmente está a promover unha declaración que reclama a elección do presidente por consenso entre as forzas políticas.

Concerto no Teatro Jofre

Unha vez rematada a rolda de prensa celebrouse unha recepción oficial no Concello. A xornada continuou coa tradicional ofrenda floral que se fai cada ano na estatua �s Ceibes de Manuel Patinha, situada no Cantón de Molíns. Desde as 20:30 horas, o Teatro Jofre acollerá o acto de entrega do galardón. Conducido polo xornalista Antón Luaces, o acto inclúe a lectura dun texto de María Val no que a xornalista reivindica o papel dos xornalistas. Val expresa no texto a súa esperanza de que “esta lembranza a José Couso e esta homenaxe aos nosos compañeiros dos Informativos da TVE sirva para arroupar estes heroes danados”, os xornalistas, porque “unha democracia pode mobilizar aos electores, pero sen xornalistas, a soberanía cidadá ráchase”.

A continuación, Yolanda Sobero, presidenta, e o resto de membros do Consello de Informativos de RTVE recibirán o galardón. Tras a entrega, ás 21:00, dará comezo o Concerto da Liberdade, coa Real Filharmonía de Galicia dirixida por Maximino Zumalave.

Co Consello de Informativos de TVE xa son oito os galardoados co Premio das �s Ceibes. Outros gañadores do Couso foron: Ali Lmrabet (2005), Le Monde Diplomatique (2006), Jon Lee Anderson (2007), José Vidal – Beneyto (2008), Rosa María Calaf (2009), Daniel Anido e Rodolfo Irago (2010) e WikiLeaks (2011).

O galardón naceu no ano 2005 e está organizado polo Colexio Profesional de Xornalistas de Galicia e o Club de Prensa de Ferrol, coa colaboración da Obra Social ‘la Caixa’.