miércoles, 29 de abril de 2026
A Axencia Galega das Industrias Culturais (Agadic) da Consellería de Cultura, Educación e Ordenación Universitaria colabora co programa Artistas en Ruta na promoción da presenza galega dentro deste circuíto, organizado pola AIE (Asociación de Artistas, Intérpretes o Ejecutantes) en máis de 60 salas de música en directo de toda España. Víctor Coyote, Ulträqäns e sete locais galegos forman parte da carteleira elaborada para o primeiro trimestre de 2012 no marco desta programación, que vén desenvolvéndose desde hai máis de 15 anos co obxectivo de potenciar a música ao vivo en estilos como o pop, rock, folk e jazz, entre outros.
O músico de Tui Víctor Coyote presentará en directo os temas do seu último traballo discográfico, Dos años luz y cuarto, en Lleida (10 de febreiro no Café Teatre), Tudela (2 de marzo en Locura de Ángel), Pamplona (3 de marzo en El Bafle) e Xixón (17 de marzo en Monkey Club), mentres que os Ulträqäns ofrecerán unha mostra do seu folk-punk en Vitoria (16 de febreiro en Ibu Hots), Mayorga (17 de febreiro no Bar Secretos), Madrid (16 de marzo en Jymmy Jazz), na localidade segoviana de Cabaña de Polendos (17 de marzo en La Oveja Negra) e Cáceres (18 de marzo en El Corral de las Cigüeñas).
Selección
Ambas bandas foron seleccionadas xunto con outros 16 grupos e solistas de toda España por unha comisión integrada por xornalistas especializados, ademais de por representantes da AIE e das entidades colaboradoras, despois dunha convocatoria aberta a todos os grupos interesados, tanto noveis como consagrados.
Neste primeiro ciclo de programación, os sete locais galegos participantes acollerán un total de oito concertos protagonizados por Supersweet, que actuará na Iguana de Vigo o 27 de xaneiro e no Pub DAntón da Laracha o 28 do mesmo mes; Eric Fuentes, que estará o 3 de marzo na Reserva de Carballo; e Mastretta, que tocará en marzo no Clavicémbalo de Lugo (día 15), El Ensanche de Vigo (día 16), El Náutico do Grove (día 17) e Aturuxo de Bueu (día 18).
Estas salas forman parte da área xeográfica do norte peninsular, que se completa con outros 15 espazos de Asturias, Cantabria, Castela e León e Euskadi. Existen, ademais, outras tres zonas que funcionan de xeito conxunto á hora de establecer o intercambio de artistas: Andalucía e Ceuta; Aragón, Cataluña, Comunidade Valenciana e Murcia; e Castela-A Mancha, Estremadura, Madrid, A Rioxa e Navarra.
Entre os obxectivos do circuíto están fomentar o intercambio cultural entre os diferentes artistas das comunidades autónomas, potenciar todos os estilos que se dan cita dentro da música popular, dar a coñecer os novos valores artísticos no eido da música, axudar á iniciativa privada e ao mercado musical en salas de pequena e mediana capacidade e, en definitiva, consolidar un circuíto localizado temporalmente no inverno que permita apoiar de xeito estable a maior variedade de propostas artísticas.
Foron presentadas as xornadas Galicia Biodays, que buscan posicionar Galicia como un territorio de referencia en innovación biotecnolóxica no ámbito internacional. Este evento vaise celebrar os días 6 e 7 de maio no Auditorio Mar de Vigo, e permitirá reforzar a marca Galicia Calidade en biotecnoloxía, fomentar o intercambio de coñecemento e establecer novas colaboracións científicas, empresariais e institucionais. Está previsto que asistan máis de 1000 persoas de 9 biorrexións convidadas, con máis de 130 relatores.
Alfonso Rueda informou de que o Consello deu conta do inicio da tramitación do anteproxecto da que será 'a primeira Lei do terceiro sector da acción social de Galicia'. Unha norma que busca 'unificar nun único texto legal a regulación deste eido e recoñecer de xeito formal o seu traballo e o papel que xogan as entidades na sociedade galega'. A necesidade de aprobar esta lei xustifícase na importante presenza destas entidades en Galicia, preto de 1.500, -que constitúen 'unha auténtica rede de solidariedade', segundo resaltou a conselleira de Política Social e Igualdade, Fabiola García-, para apoiar as persoas e fogares máis vulnerables.
