Notas de prensa

A casa de Castelao en Rianxo, declarada Ben de Interés Cultural (BIC)

O presidente da Xunta en funcións, Emilio Pérez Touriño valorou positivamente a declaración de Ben de Interese Cultural da vivenda familiar de Castelao en Rianxo, aprobada polo Consello, como sitio histórico polo seu valor simbólico ao constituír un espazo no que se formou como artista, intelectual e político.

Esta declaración, que conta cos informes favorables da Real Academia de Belas Artes, do Consello da Cultura Galega e da Universidade de Santiago, en palabras de Touriño, “pon en valor o que significa a biografía de Castelao para a comunidade autónoma e para os galegos”.

“Paréceme afortunado que poidamos concluír este expediente de Ben de Interese Cultural na súa categoría máxima de sitio histórico, co que recoñecemos como comunidade e como Goberno do país o valor histórico e o valor simbólico da casa e outorgámoslle o máximo grao de protección prevista na lexislación galega para o patrimonio cultural do noso país”, reiterou.

Actualización Plan Territorial de Emerxencias

Por outra banda, o Consello da Xunta tamén aprobou a actualización do Plan Territorial de Emerxencias de Galicia (PLATERGA), que adecúa o plan existente do ano 1994 á nova Lei de Emerxencias de Galicia e inclúe o cálculo de risco potencial de cada concello.

O PLATERGA permite a xestión das emerxencias de carácter extraordinario e habilita os procedementos, instrumentos e medios para responder diante de situacións de emerxencia. Segundo puntualizou o presidente en funcións da Xunta, cualifica os niveis de emerxencia ata o nivel máximo, cando se declara de interese galego a emerxencia; ou tamén, de interese nacional, cando se necesitan recursos e medios doutros ámbitos diferentes na comunidade autónoma.

Plan Especial fronte ao Risco Sísmico

Na reunión do Executivo autonómico en funcións, aprobouse tamén o primeiro Plan Especial fronte ao Risco Sísmico de Galicia, o SISMIGAL, que deriva do propio PLATERGA e permite determinar os puntos de maior risco de incidencia sísmica na nosa comunidade. O plan establece aqueles concellos con obriga de realizar un plan especial municipal fronte ao risco sísmico por ser especialmente sensibles: As Nogais, Baralla, Becerreá, Láncara, Samos Sarria, Triacastela, Navia de Suarna, Negueira de Muñiz, Ourol e Ribeira de Piquín.

Granxa de cultivo de orella de mar

Aprobouse tamén o Proxecto Sectorial de Interese Supramunicipal da primeira granxa mariña destinada ao cultivo de orella de mar. Pérez Touriño explicou que se trata dun cultivo cunha tecnoloxía innovadora e un proxecto presentado por Galician Marine Aquaculture, que conta cunha superficie de 47.000 metros cadrados. Unhas instalacións que estarán situadas na localidade de Muros e nas que se van investir 4,6 millóns de euros. Xerará ao redor de 69 postos de traballo entre directos e indirectos e ten como obxectivo chegar a unha produción de 243 toneladas de orella de mar por ano, que se incrementarán en anos vindeiros.

O Consello aprobou ademais a subvención con 240.000 euros para a adquisición de 6 vivendas protexidas para aloxar familias do poboado chabolista de Penamoa na Coruña, e a ampliación ata o 50 por cento da participación do Goberno galego na construción e equipamento dos parques comarcais de bombeiros da Coruña.