martes, 16 de junio de 2026
O titular da Xunta, Emilio Pérez Touriño, salientou a traxectoria vital de Manuel Amor Deus, a quen cualificou como un magnífico símbolo de todos os que loitaron por lograr a democracia e o réxime de liberdades dos que hoxe desfrutamos. Durante o acto de homenaxe á memoria do que foi o primeiro secretario xeral de CC.OO. e cofundador das CC.OO. en Galicia, Emilio Pérez Touriño fixo un repaso pola traxectoria vital, política e sindical de Manuel Amor Deus, indicando que foi un home xurdido da clase obreira ferrolá rebordante de dignidade, orgullo e profesionalidade. Era un home bo e entrañable, afectuoso, alegre e intelixente, cun extraordinario sentido da xustiza, aseverou o mandatario galego, lembrando que Manuel Amor era un amante da liberdade, que loitou por ela e que tivo que pagar un duro prezo por esa loita cando foi encarcerado por causa das súas actividades políticas e sindicais.
Na mesma liña, Pérez Touriño remarcou que Amor Deus foi un símbolo de toda esa xeración xenerosa, valente e comprometida que soubo resumir no berro reivindicativo Liberdade, amnistía, Estatuto de Autonomía, todo un programa político, unha auténtica folla de ruta para saírmos do marasmo do franquismo, asegurou o presidente galego.
Actividade sindical
Na súa intervención, o presidente da Xunta tamén fixo un repaso pola actividade sindical de Manuel Amor Deus, indicando que era un sindicalista de primeira fila, salientando o seu labor á fronte de Comisións Obreiras de Galicia e incidindo en que foi unha peza clave para que o sindicato adecuase as súas estruturas e formas de actuación aos novos tempos democráticos e para que fixese a súa propia transición, convertendo a exemplar organización resistencial antifranquista nun sindicato novo, sólido e capaz de canalizar construtiva e democraticamente as demandas do mundo do traballo.
Por último, o presidente galego referiuse á próxima aprobación no Congreso dos Deputados da lei que outorgará o recoñecemento ás vítimas e represaliados do franquismo, indicando que cada voto afirmativo significará unha homenaxe e unha lembranza a Manuel Amor Deus, a Rafael Bárez, a Xulio Aneiros, a Xosé María Riobóo, a Paco Filgueiras e a tantos e tantos homes e mulleres que xa non están entre nós e que militaron desde a esquerda na causa da democracia e dos dereitos dos traballadores.
Neste sentido, avogou por manter viva entre as novas xeracións a memoria do antifranquismo e congratulouse da próxima aprobación dunha lei que, salientou, non pretende reabrir fendas nin dividir á sociedade, senón tan só facer xustiza. Non se trata nin de revivir agravios nin de encirrarnos en disputas que xa non teñen sentido. Nin queremos resucitar o pasado, nin cambialo, nin moito menos, repetilo. Pero si queremos que as novas xeracións saiban que a democracia e o réxime de liberdades que hoxe disfrutamos non foi un agasallo nin é o estado natural das cousas. Que saiban que se hoxe vivimos en paz e en democracia é grazas ao esforzo, ao sacrificio e ás convicións de persoas como Manuel Amor Deus, concluíu o mandatario autonómico.
A posta en marcha do Rexistro galego de persoas centenarias, Regace, sitúa Galicia nunha posición de referencia para o estudo da lonxevidade, posibilitando coñecer mellor as claves deste fenómeno e afrontar os retos que presenta. Preto de 1.800 persoas de cen ou máis anos viven na comunidade galega, o que supón ao redor do 12 % de toda a poboación centenaria de España, un dato que fala da realidade demográfica de Galicia e reflicte unha oportunidade única para aprender, investigar e avanzar. Deste xeito, Galicia presenta un dos mellores resultados no que a esperanza de vida se refire: 81,19 anos para os homes e 86,83 para as mulleres, superando en ambos os casos a media estatal.
A mostra a 'Illa ignorada' estará aberta ata o 12 de febreiro de 2027 e toma o seu título do primeiro poemario da escritora Gloria Fortes. Nela cabe destacar os traballos tanto dos artistas galegos Alberto Ardid, Vicente Blanco, Andrea Costas, Caxigueiro, Fina Mantiñán, Juan Carlos Meana, Ariadna Silva, Seoane e María Elena Montero, como os de Abel Azcona, Amparo Garrido, Regina Giménez, Antoni Muntadas, Sonia Navarro, Íñigo Royo, Regina Silveira. Ademais desta nova mostra, o centro tamén inaugurou a ampliación, no dobre espazo do Centro Galego de Arte Contemporánea, da exposición Misha Bies Golas, que abriu ao público o pasado 22 de maio cunha escolma de máis de dúas décadas da creación heteroxénea do lalinense Miguel Calvo Ulloa, un dos fundadores do colectivo Nova Escultura Galega.
