Notas de prensa

A Xunta emprende unha profunda reforma do sistema sanitario público galego

O presidente da Xunta, Emilio Pérez Touriño, asegurou un importante proceso de transformación da sanidade pública en complicidade coa sociedade galega co obxecto de mellorar a calidade e de incrementar a eficiencia do sistema sanitario. Pérez Touriño realizou esta valoración no decurso do acto de inauguración do novo edificio cirúrxico do Complexo Hospitalario de Ourense, que contou cun investimento de 58 millóns de euros.

O máximo mandatario autonómico cualificou este novo edifico inaugurado como clave dentro do novo mapa de infraestruturas hospitalarias. Este edificio, asegurou Touriño, convértese nunha realidade cargada de presente e de futuro para Ourense, para a súa provincia e para Galicia enteira. Neste sentido, Pérez Touriño referiuse ao substantivo nivel de melloras deste edificio que posibilita dotar de mellores instalacións ás áreas médicas de cirurxía, reanimación, espertar, urxencias, esterilización, farmacia, anatomía patolóxica e radioterapia, así como novas dependencias para os profesionais de garda.

Ademais, o presidente da Xunta indicou que este edifico que hoxe se pon en marcha non é o final dun proxecto. É, simplemente, a primeira pedra da reconfiguración, da verdadeira reordenación do novo hospital de Ourense. En concreto, Pérez Touriño referiuse á ampliación futura do complexo hospitalario de Ourense que beneficiará a todos os cidadáns da provincia con maior capacidad2 asistencial e tamén con novas prestacións.

Ademais Touriño engadiu que a Xunta de Galicia está a traballar na procura dun novo modelo sanitario-cultural que vaia abordando, dun xeito ordenado e urxente, o proceso de transición e transformación que temos iniciado. A este modelo de política sanitaria Touriño denominouno de “cohesión social”, ao ter no epicentro da súa acción ao paciente. Neste sentido,referiuse a iniciativas concretas como o decreto que regula o dereito a unha segunda opinión médica, aprobado hoxe polo Consello da Xunta ou a futura Lei de Saúde de Galicia, tamén estudada hoxe polo Goberno galego na súa reunión semanal.

Ao respecto do proceso de transformación da Sanidade Pública, o presidente galego referiuse aos ámbitos de actuacións máis salientables nos que se está a actuar. Dunha banda, referiuse á política de recursos humanos; doutra, á mellora do financiamento do sistema económico e, por último, á reorganización e mellora da xestión do sistema sanitario público.

Plan de Mellora da Atención Primaria 2007-2011

O titular do Goberno autonómico detallou, tamén, algunhas das medidas máis sobranceiras en política sanitaria que está a desenvolver o seu Goberno. Neste sentido, referiuse á necesidade de continuar o proceso de mellora da Atención Primaria. Segundo resaltou o máximo mandatario autonómico, existe un Plan de Mellora da Atención Primaria 2007-2011 que permitirá mellorar as condicións laborais dos profesionais deste ámbito esencial do noso sistema. Este Plan, tal e como afirmou Touriño, está dotado con 62,5 millóns de euros e permitirá, entre outros aspectos, que antes de finais de 2007 se chegue a que máis do 90 por cento das consultas médicas dos centros de saúde conten con acceso a IANUS, a historia clínica electrónica.

Ademais, o presidente galego afirmou que desde primeiros de ano estase a acometer a reforma da atención especializada. Unha reforma –dixo- que incidirá no redeseño dos modelos organizativos da atención neste nivel asistencial, asentada na integración da asistencia; no establecemento de modelos de xestión integral dos modelos prevalentes e no da xestión clínica.

Por último, Emilio Pérez Touriño referiuse a que o novo edificio cirúrxico do Complexo Hospitalario de Ourense é realidade grazas á participación, á colaboración e á paciencia dos profesionais sanitarios deste hospital. Deste xeito quixo salientar que é o produto dunha notable participación social que se erixe como expresión máxima de democracia moderna, de progreso e de futuro.