miércoles, 24 de junio de 2026
A Asociación Mozas e Mozos de Beluso (Bueu), cifrou nunhas 8.000 persoas o número de asistentes ó festival A Noite do Trasno, que se celebrou durante a fin de semana pasada no Cabo Udra. O público vibrou cos directos do venres ó cargo de Los Pulseritas, La Familia Iskariote, Os Cempés e A Banda de Pulpiño Viascón, mentres que o sábado a festa veu da man de Malas Pulgas, A Gran Treboada, El Combolinga e Zënzar, ambos os dous días con sesións de Dj ata altas horas da madrugada.
Xunto cos concertos, en Cabo Udra desenvolvéronse outras actividades como obradoiros e xogos populares, que colleitaron unha boa acollida. Mozas e Mozos organizou ademais durante os días previos ó festival unha Semana Cultural cunha oferta diversa que abrangueu dende sesións sobre medio ambiente e comercio xusto ata espectáculos de maxia, charlas sobre a recuperación da memoria histórica ou unha observación astronómica que congregou a medio cento de persoas para contemplar o firmamento nocturno en Chan de Esqueiros.
Efectos negativos do botellón
O presidente da Asociación Mozas e Mozos de Beluso, Carlos Lamosa, amosou a súa satisfacción co desenvolvemento da sexta edición de A Noite do Trasno, pero sinalou como nota negativa os efectos do botellón efectuado por boa parte dos asistentes, xa que esta práctica repercute non só nunha meirande produción de lixo, senón tamén sobre un menor consumo nas barras instaladas pola organización con prezos populares- e, polo tanto, sobre a principal fonte de financiamento do festival.
Doutra banda, Mozas e Mozos constatou a solidariedade de moitos asistentes que apostaron polos produtos da organización e, sobre todo, no que se refire á adquisición do ECOborralleiro ou cinceiro portátil e do ECOvaso distribuídos pola empresa Ecofestes-, que polo módico prezo de 1 euro permitía disfrutar durante toda a noite dun só recipiente para a bebida que logo se podía devolver ou gardar como recordo, reducindo así os residuos plásticos. Varios asistentes ó festival participaron ademais nas tarefas de limpeza acometidas pola organización despois dos concertos, sobre todo o domingo pola mañá, conseguindo que a área natural de Udra quedase igual ou máis limpa que antes de A Noite do Trasno.
Carlos Lamosa salientou tamén o bo funcionamento da zona de acampada habilitada pola Asociación fóra do espazo protexido, xa que se cubriron practicamente todas as prazas pese ás queixas iniciais por non atoparse á beira da zona de concertos, senón a uns dez ou quince minutos camiñando.
Mozas e Mozos amosou ademais o seu agradecemento a todas as entidades, colectivos, comerciantes e persoas individuais que prestaron a súa colaboración para que A Noite do Trasno fose realidade un verán máis en Cabo Udra.
A Xunta de Galicia vén de remitir ás organizacións sindicais a proposta para adiantar a 2028 a redución de ratios na etapa de Secundaria, que será abordada na Mesa Sectorial Docente que terá lugar o vindeiro día 30. A documentación elevada pola Consellería de Educación, Ciencia, Universidades e FP recolle que a partir de setembro de 2028 implantarase a redución de ratios ata 25 alumnos por aula na ESO fronte aos 30 vixentes no conxunto de España. Esta diminución arrancará para 1º curso de ESO e irá implementándose ano a ano e curso a curso. Unha vez completada toda a etapa de ESO, arrancará a redución a 30 alumnos por aula en Bacharelato, fronte aos 35 a nivel estatal, aínda que en Galicia xa está a 33.
O presidente da Xunta, Alfonso Rueda, anunciou o nome dos galardoados coas Medallas Castelao 2026, despois de que o Consello aprobase concedérllelas ao músico Esteban Batallán Cons, á científica Mar Capeáns Garrido, ao atleta Adrián Ben, á propietaria dos restaurantes La Penela, María Barallobre, e á Fundación Andrea. É un dos recoñecementos máis importantes da nosa Comunidade. O Consello acordou recoñecer o traballo da Fundación Andrea, que apoia de xeito integral ás familias con nenos con enfermidades de longa duración, crónicas ou terminais.
