sábado, 8 de agosto de 2026
O Laboratorio de Aplicacións do Láser do Centro de Investigacións Tecnolóxicas (CIT) da Universidade da Coruña, en colaboración coa Consellaría de Innovación e Industria, está a realizar un proxecto para o uso do láser na restauración do patrimonio galego, especialmente no caso de elementos de granito. A investigación acadou 80.000 euros de financiamento de I+D+i dentro do Programa de axudas de Tecnoloxías da Construción e Conservación do Patrimonio do Plan Galego de Investigación, Desenvolvemento e Innovación Tecnolóxica.
O proxecto do laboratorio está encamiñado a dotar a Galiza dun equipo de láser que o Laboratorio desprazaría ás obras e lugares de interese, mellorando as tecnoloxías que existen actualmente a disposición do tecido empresarial galego. A investigación nesta materia conta xa cunha base consistente na Universidade da Coruña, pois o equipo do CIT que dirixe Armando Yáñez leva algún tempo estudando os seus usos. Como novidade nesta investigación, mentres os estudos anteriores serviron para ver cales son as capacidades do láser en arqueoloxía e en restauración, a investigación actual aproxímase en maior medida ás empresas, para coñecer as súas necesidades particulares, e ao uso do láser en granito.
Deste xeito, un dos elementos máis importantes do proxecto é a investigación que se fará dos usos do láser sobre o granito, un material predominante no patrimonio arquitectónico e artístico de Galiza. A partir de datos e de seleccións de emprazamentos que realiza o grupo de Edafoloxía da Universidade de Santiago de Compostela, os especialistas estudan a eficacia do láser como ferramenta de recuperación de construcións feitas con granito.
Ademais do traballo con este material, os responsables do estudo están comezando a planificar a actuación sobre obras do Museo de Pontevedra, que está previsto que se acometan o próximo ano. Neste caso, traballarase sobre diferentes materiais e soportes, con intervencións sobre policromías, retablos, etc.
ACTUACIÓNS POUCO AGRESIVAS
Sobre a importancia desta investigación, Armando Yáñez destaca que o láser está a substituír ás técnicas tradicionais de análise elemental en conservación do patrimonio, como son a microscopía electrónica ou os raios X. Tanto na restauración como en arqueoloxía, segundo este experto o láser mellora as tecnoloxías que o preceden porque permite unha actuación pouco agresiva e analítica.
Concretamente, en restauración actúa selectivamente sobre o material, o que permite eliminar unha capa sen alterar a que está debaixo e evitar así posibles danos. Esta mesma capacidade é fundamental para a análise arqueolóxica, xa que permite diferenciar as capas, analizar a súa composición e detallar os materiais ou as pinturas.
Na actualidade, o Laboratorio de Aplicacións do Láser está a traballar con empresas como Palladium, Galicia Proarte, Estudio de Arqueoloxía Ferrol e Adobrica Arqueoloxía, ademais de coa Escola Superior de Conservación e Restauración de Pontevedra, co Museo de Pontevedra e co Museo de Prehistoria e Arqueoloxía de Vilalba. O grupo de traballo recolle as suxestións e demandas das empresas e institucións coas que colabora con respecto ás aplicacións do láser para despois analizar no laboratorio a viabilidade desas actuacións en concreto.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
