lunes, 10 de agosto de 2026
A Asociación Mozas e Mozos de Beluso vén de recibir a resolución da Consellería de Medio Ambiente pola que o departamento autonómico lle concede ó colectivo "autorización previa para a realización do Festival A Noite do Trasno no lugar de Chan de Esqueiros, na zona de especial protección dos valores naturais de Cabo Udra", ubicada na parroquia de Beluso, en Bueu (Pontevedra). Mozas e Mozos está tramitando agora as solicitudes correspondentes ante a Consellería de Medio Rural, a Xunta de Montes e o Concello de Bueu, co obxectivo de acadar os permisos das diferentes entidades implicadas para poder celebrar o festival no vindeiro mes de agosto.
Á espera de conseguir o visto bo destes organismos, os membros da Asociación comezarán axiña a traballar para cumprir as condicións establecidas no documento remitido dende a delegación provincial de Medio Ambiente, que en ningún caso permite a instalación da zona de acampada no ámbito do espazo natural, polo que a organización terá que buscar un emprazamento alternativo para que o público de A Noite do Trasno monte as súas tendas de campaña.
Condicións xerais e específicas
A proposta de resolución asinada pola xefa do Servizo de Conservación da Natureza, Susana Torres, establece na primeira parte do escrito requisitos particulares como a instalación dun valado móbil para acotar a área das actividades, dotación de persoal de vixilancia e control ou cabinas sanitarias autónomas. Estes condicionamentos súmanse ós compromisos adquiridos pola propia Asociación, que garante a promoción dos valores medioambientais do espazo natural, a limpeza da zona, a dotación de medidas de protección de incendios ou de sistemas de evacuación e primeiros auxilios, entre outras cuestións.
A segunda parte do documento é a resolución emitida polo delegado provincial de Medio Ambiente, Juan Francisco Froján, quen concede a autorización previa suxeita ademais a condicións xerais, como a necesidade de contar cos restantes permisos sectoriais pertinentes ou a responsabilidade sobre as infraccións que puideran cometer os asistentes.
Amplos apoios na negociación
Mozas e Mozos considera que este pronunciamento positivo constitúe un significativo paso adiante, se ben non definitivo, para conseguir que o festival A Noite do Trasno sexa realidade un verán máis en Cabo Udra. O colectivo estima que a resolución afirmativa é froito da tarefa negociadora levada a cabo cun amplo respaldo social e que incluíu diversas reunións cos responsables provinciais de Medio Ambiente á que membros da directiva da Asociación acudiron acompañados de distintos representantes políticos da Corporación local, incluso cunha visita do propio delegado Juan Francisco Froján ó espazo natural.
Mozas e Mozos de Beluso agradece as mostras de cariño e os apoios amosados por persoas individuais e colectivos de todo tipo e lugar, que animan ó colectivo a seguir traballando para celebrar a sexta edición do festival A Noite do Trasno. A Asociación convocará nas próximas datas un encontro cos responsables dos grupos políticos municipais para constatar o grao de respaldo co que conta a iniciativa.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
