Notas de prensa

Galicia ocupará o lugar central da Feira Marítima máis importante do mundo

Cada catro anos ducias de miles de persoas acoden a Brest, na Bretaña francesa, á maior concentración de embarcacións tradicionais de todo mundo. Por primeira vez, Galiza participará nesta Feira, que é tamén o principal evento da cultura marítima, e farao como país convidado de honra, ocupando un lugar central. A conselleira de Cultura e Deporte, �nxela Bugallo, asinou hoxe en París o convenio coa organización que permitirá levar a tradición marítima galega para a edición de 2008.

Bugallo asinou o acordo de colaboración co presidente da Asociación Brest 2008 e alcalde de Brest, François Cuillandre. “Queremos compartir a nosa riqueza e participar nunha posta en común da diversidade cultural que ten o mar como fondo común”, afirmou a conselleira.

Bugallo estivo acompañada do presidente da Federación Galega pola Cultura Marítima e Fluvial, Fernando Piñeiro; e polo director xeral de Turismo, Rubén Lois. Ambas as dúas institucións participarán no desembarco galego en Bretaña.

Programación cultural e turística en paralelo

O patrimonio marítimo, a música e cultura e a gastronomía do noso país ocuparán un lugar privilexiado na Feira de Brest, do 11 a 16 de xullo de 2008. “Galiza traerá a esta lkocalidade o mellor da súa cultura náutica: as embarcacións que forxaron a nosa tradición; a arte e o folclore que nos define e que forma parte da nosa identidade”, engadiu Bugallo.

Serán un total de 20 as embarcacións que representarán a tradición marítima das rías e da costa galega. As embarcacións estarán abertas ao público e participarán en desfiles diarios. Ao seu carón, un espazo especialmente preparado acollerá exposicións sobre o patrimonio marítimo do noso país e sobre as posibilidades turísticas de Galiza. O obxectivo é promover tanto a riqueza marítima galega como os restantes recursos culturais e turísticos que ofrece o noso país. Cómpre ter en conta que a esta cita acoden milleiros de visitantes de Francia e de todo o mundo.

Neste sentido, a Consellaría organizará un escenario propio dentro do recinto galego, que acollerá todos os días actuacións musicais e obradoiros de actividades tradicionais. A representación galega completarase cun restaurante no que se ofrecerá unha escolma da mellor gastronomía do noso país.

Participación en Vigo e en Ferrol

O convenio asinado hoxe pretende establecer unha colaboración estable no eido da cultura marítima entre Galiza e Bretaña. Desta maneira, unha delegación da feira de Brest participará no Salón Náutico de Vigo, (do 1 ao 4 de marzo de 2007) e na Festa do Mar de Ferrol (en xullo do 2007). Esta colaboración coa principal rexión marítima de Francia e a participación no meirande foro mundial da tradición marítima constitúe un pulo para a cultura marítima e o sector da náutica en Galiza.