Notas de prensa

Innovación e Industria desenvolverá o programa Peme Dixital para aumentar a implantación do negocio electrónico en xeral e da factura electrónica en particular

O conselleiro de Innovación e Industria, Fernando X. Blanco, avanzou que o seu departamento vai poñer en marcha o programa “PEME dixital”, co que se pretende aumentar a implantación do negocio electrónico, incluíndo en particular a implantación da factura electrónica. Segundo explicou o conselleiro, as actuacións incluídas no proxecto contemplan os obxectivos de implantar nas pemes solucións TIC dispoñíbeis no mercado, fomentar a dispoñibilidade de novas solucións de negocio electrónico, incluída a factura electrónica ou facilitar a participación efectiva das pemes nos mercados electrónicos, entre outros.

En concreto, Innovación e Industria impulsará actuacións específicas de apoio ás pemes neste ámbito de actuación. Así, o departamento autonómico desenvolverá e proporcionará compoñentes básicos de factura electrónica baixo licenza de código aberto ou software libre, amais de dar soporte loxístico e tecnolóxico ás empresas de desenvolvemento de sotware de Galiza para que implanten módulos de facturación electrónica aos seus paquetes de facturación tradicional. Para a execución deste programa contase cun orzamento conxunto de 1.356.220 euros, achegados pola Consellaría (640.000 euros) e polo Ministerio de Industria (696.220 euros).

O conselleiro nacionalista fixo este anuncio durante a inauguración das mesas de traballo do Plan Estratéxico Galego para a Sociedade da Información (PEGSI), que deron comezo en Santiago coa participación de case 70 profesionais de distintos ámbitos de actuación. Fernando Blanco recordou na súa intervención a importancia deste plan que terá vixencia para o período 2007-2010 e que cun orzamento de alomenos 800 millóns –dos que 600 serán achegados polo Goberno Galego– inclúe a posta en marcha de 100 iniciativas para acadar o despregamento da Sociedade da Información no país.

O titular de Innovación e Industria subliñou a participación dos principais axentes tecnolóxicos, económicos e sociais galegos no plan que, aproveitando as potencialidades da Internet, favorecerá a superación de barreiras como a dispersión poboacional ou a polarización rural-urbano que condicionaron ata o de agora o desenvolvemento de determinadas áreas do país. O PEGSI fai especial fincapé tamén no desenvolvemento de contidos e servizos próximos aos galegos, sen esquencer o despregue das infraestruturas necesarias como por exemplo a banda larga.

Neste sentido, Blanco destacou a existencia de numerosas propostas para incrementar os contidos galegos e en galego e nesta liña recordou a iniciativa PuntoGal, un proxecto que nace co obxectivo de acadar un dominio propio de primeiro nivel para a lingua e a cultura galegas. Esta iniciativa vén a fortalecer o papel de Internet como instrumento para o desenvolvemento do país, complementando así un obxectivo que tamén está presente no PEGSI.

O conselleiro recalcou as expectativas positivas do sector das telecomunicacións: segundo as institucións europeas, unha taxa interanual de crecemento do 3% e dun 5% no caso concreto das actividades informáticas. Para o titular de Innovación e Industria Galiza non é allea a estas dinámicas e de aí o esforzo do Goberno Galego en prol da converxencia con este contexto. Neste sentido recordou que os indicadores de penetración da Sociedade da Información en Galiza melloraron significativamente, duplicando en moitos casos a taxa de crecemento estatal.

A xornada de traballo sobre o Plan Estratéxico Galego para a Sociedade da Información organízase en 3 mesas de traballo: a do sector TIC, presidida pola directora xeral de Promoción Industrial e Sociedade da Información, Elena Veiguela; a de cidadáns e identidade cultural na Sociedade da Información, presidida pola directora do Servizo Galego de Promoción da Igualdade do Home e da Muller, Ana Luisa Bouza; e a de Administración local e desenvolvemento local, presidida pola concelleira do �rea de Servizos Xerais do Concello de Lugo, Luisa Zarzuela.

A primeira das mesas centrarase nas infraestruturas; o desenvolvemento do sector empresarial da Sociedade da Información; a aplicación das TIC polo tecido empresarial; e os instrumentos para a xestión das políticas públicas da Sociedade da Información; a segunda das mesas analizará os contidos e servizos; a inclusión e sustentabilidade; a interoperabilidade, seguridade e coñecemento aberto, e os instrumentos para a xestión das políticas públicas da Sociedade da Información; e a terceira das mesas centrarase, ademais de nos instrumentos para a xestión das políticas públicas da Sociedade da Información, nos servizos públicos de calidade, nas infraestruturas para a Sociedade da Información; e na inclusión e sustentabilidade.