martes, 11 de agosto de 2026
A obra En la cuenca de tus ojos, dos coreógrafos Alexis Fernández, Armando Martén, Kirenia Martínez e Ana Beatriz Pérez, resultou gañadora do IV Certame de Creación Coreográfica de Galicia que organiza o IGAEM (Instituto Galego das Artes Escénicas e Musicais) da Consellaría de Cultura e Deporte. Os galardoados con este primeiro premio, polo que recibirán 4.000 , forman parte da compañía coruñesa Inquedanza, coa que están a representar a coreografía gañadora por diferentes escenarios galegos dende o pasado mes de abril.
Cunha dotación económica de 2.500 , o segundo premio foi para a peza Ayer y hoy, creada e interpretada polas madrileñas Verónica Garzón, Mireia Sans Aleu e Edurne Sanz. Tamén dende Madrid chegou a proposta galardoada co terceiro premio deste certame, Éxodos, presentada por Francisco Leiva e interpretada por el mesmo xunto a María Arcos, María González, Marta Gómez e David Amandi. Leiva recibirá 2.000 por este terceiro posto.
BAILARINA SOBRESAÍNTE
O xurado integrado pola bailarina e coreógrafa Maruxa Salas, como presidenta, e por Begoña Acuña, presidenta da Asociación Galega de Profesionais da Danza; Vicente Colomer, representante da Asociación de Profesionais da Danza Escénica; Natalia Balseiro, coordinadora da unidade de produción de danza do IGAEM; e María Paredes, coordinadora de programación do IGAEM, como vogais recoñeceu, ademais, o labor interpretativo de Ana Beatriz Pérez na obra gañadora, outorgándolle o premio ao/á bailarín/a sobresaínte, dotado con 1.500 .
En la cuenca de tus ojos, inspirada nas diferentes sensacións que arrodean ao amor como sentimento e ao arrepentimento polos erros cometidos coa persoa amada, está interpretada polos seus catro creadores, todos eles de orixe cubana e afincados en Galicia, onde na actualidade desenvolven a súa actividade profesional como coreógrafos e bailaríns.
Esta peza, que obtivo tamén o primeiro premio no V Certame Internacional de Coreografía Burgos-New York 2006, intégrase nun espectáculo máis amplo que, baixo o mesmo título, está a escenificar dende o pasado mes de abril a compañía Inquedanza baixo a dirección de Armando Martén. Así, por exemplo, En la cuenca de tus ojos insírese na programación de Rededanza, promovida polo IGAEM, dentro da que poderá verse o vindeiro día 22 de decembro no Auditorio-Pazo de Congresos de Ourense.
O Certame de Creación Coreográfica, o único das súas características en Galicia, organízase anualmente como plataforma de exhibición de novas creacións co obxectivo de incentivar a actividade profesional neste sector artístico, así como a investigación, a innovación e as postas en escena imaxinativas.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
