viernes, 6 de noviembre de 2026
A Secretaría Xeral de Política Lingüística vai colaborar coas empresas de servizos fúnebres que operan en Galicia para favorecer a galeguización deste sector. Marisol López mantivo unha xuntanza con representantes deste sector, que lle expuxeron a posibilidade de editar dúas publicacións coas que se facilitaría a oferta dos servizos funerarios en lingua galega.
Unha das publicacións que se están preparando conterá os distintos protocolos funerarios que se establecen en diferentes confesións relixiosas e tamén nas celebracións fúnebres de carácter laico.
A segunda das propostas é a elaboración dun documento sobre servizos funerarios en galego (modelos de esquelas, lápidas, notas necrolóxicas, rotulación das coroas, etc.).
A Secretaría Xeral de Política Lingüística colaborará na edición destas publicacións, que poderán servir para procurar un maior uso do galego neste sector. De feito, o Plan Xeral de Normalización da Lingua Galega propón o establecemento de contactos co empresariado dos servizos fúnebres para que, utilizando os materiais existentes en galego, practiquen cos seus clientes a oferta positiva de ofrecérenlles de entrada en galego os seus servizos, maiormente ás persoas que sempre o falaron.
Na actualidade, a utilización da lingua galega tanto nos actos funerarios coma nos cemiterios é moi inferior ao uso da mesma na sociedade, polo que cómpre desenvolver políticas de impulso ás empresas para que estas ofrezan os seus servizos en galego.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
