martes, 11 de agosto de 2026
O xurado do Premio Humanitas, dedicado a accións solidarias e convocado polo Consello Social e a Asociación de Antigos Alumnos e Amigos da USC (AAAAUSC), decidiu recoñecer o labor de Carlos Martínez Uzal, creador en 1995 da Asociación Itinera que, en calidade de técnico de Voluntariado, se encarga da coordinación e xestión dos seus programas dirixidos a todas as persoas que sofren trastornos mentais severos e persistentes.
A Insignia de Prata da AAAAUSC e o premio en metálico de 2.000 euros seralle entregado a Carlos Martínez, que durante unha década colaborou na Oficina de Voluntariado da USC que propuxo a súa candidatura, nunha cerimonia pública que se celebrará en datas posteriores.
O xurado reunido na sede do Consello Social estivo formado polo presidente do Consello Social da USC, Manuel Puga Pereira; Emilio Crespo Correa como voceiro do Consello Social; o presidente da AAAAUSC, Perfecto Yebra Martul-Ortega; o secretario desta, Santiago Amor Barreiro; e o vicerreitor de Comunidade Universitaria e Compromiso Social, José M. Mayán Santos.
Os membros do xurado quixeron tamén recoñecer o labor social comprometido das outras dúas candidaturas presentadas. Por unha banda, destacaron o traballo de Mónica Domínguez Pena, delegada para Galicia de Coopera (Mozos para a Cooperación Internacional ao Desenvolvemento) e encargada de coordinar o campo de traballo en Angola, que ademais organizou por segundo ano consecutivo en Santiago a Olimpíada Solidaria de 2005. Por outra, o xurado destacou o importante esforzo de Pilar Astray Sanmartín, tesoureira de Abagal (Asociación de Bulimia e Anorexia de Galicia).
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
