martes, 11 de agosto de 2026
O titular da Xunta, Emilio Pérez Touriño, anunciou que o Goberno que preside destinará o vindeiro ano 2007 un total de dez millóns de euros destinados a promover a integración laboral de persoas con discapacidade. O máximo mandatario galego así o sinalou durante a visita que realizou ao Centro Especial de Emprego de Trameve, destinado á venda de compoñentes de vehículos e que ten como obxectivo prioritario favorecer a integración laboral de persoas con discapacidade. Durante o percorrido por Trameve, o presidente da Xunta estivo acompañado polo conselleiro de Traballo, Ricardo Varela.
Nos orzamentos de 2007 hai un total de 10 millóns de euros destinados a esta finalidade, indicou Pérez Touriño, comprometendo ademais que a Xunta seguirá a traballar nesta liña. No ano 2006 os programas para a integración laboral das persoas con discapacidade nos centros especiais de emprego contaron cun orzamento de 6.600.000 euros e no vindeiro exercicio, no ano 2007, o orzamento nesta materia ascende aos 7.500.000 euros, aos que hai que sumar outros 2,5 millóns destinados a actividades complementarias.
Na súa intervención, o máximo mandatario autonómico sinalou que o obxectivo é que o vindeiro ano estea en pleno funcionamento unha rede de centros especiais de emprego. Serán un total de 100, que se potenciarán ata ofrecer traballo a preto de 1.400 persoas.
Liñas de actuación para a integración dos discapacitados
O presidente da Xunta lembrou ademais, que unha prioridade da acción de Goberno consiste precisamente en dar as máximas posibilidades e conseguir a máxima capacidade de integración das persoas que teñen algún tipo de discapacidade, integración en todos os campos pero, fundamentalmente, no que ten que ver co mundo laboral.
Por iso o Goberno galego está a traballar nunha tripla dirección para a inserción no mundo laboral das persoas que padecen algún tipo de discapacidade: tratando de buscar un itinerario personalizado e realizando un seguimento directo das persoas con discapacidade para procurar a súa integración directa ao mundo laboral; impulsando o autoemprego; ou ben a través dos centros especiais de protección de emprego, como o visitado hoxe polo presidente galego.
Referíndose concretamente aos centros especiais de emprego, Pérez Touriño lembrou a súa función de tránsito e de ponte para buscar a incorporación plena no mundo laboral das persoas con discapacidade.
Así mesmo, o titular da Xunta aproveitou a súa visita ao centro de Trameve para facer un chamamento á colaboración de toda a sociedade para facer ese esforzo na dirección positiva de garantir a integración dos que padecen algunha discapacidade, algo que considerou esencial.
Vitalidade do mercado de traballo
En declaracións aos medios de comunicación, o máximo mandatario autonómico tamén valorou positivamente, a vitalidade do mercado de traballo galego. A este respecto sinalou que os últimos datos da Epa verifican que hai un empuxe importante no mercado de traballo de Galicia, unha dinámica positiva. Segundo a Enquisa de Poboación Activa, Galicia é a Comunidade de España onde se ten achegado máis na creación de emprego e no crecemento de actividade e onde se ten reducido a taxa de paro de forma moi significativa xa que, segundo remarcou Pérez Touriño, por primeira vez en 25 anos estamos por debaixo da cifra dos 100.000 parados e a taxa de paro está por baixo da taxa española.
Emilio Pérez Touriño salientou a necesidade de seguir traballando nesta dirección, amosándose confiado en que no vindeiro ano 2007 sexa tamén un ano moi importante para Galicia en termos de crecemento de emprego e diminución do paro.
Centro de Trameve
O Centro Especial de Emprego Trameve, visitado hoxe polo mandatario galego e promovido pola Confederación Galega de Minusválidos (COGAMI), está dedicado á recuperación de vehículos con destino á venda e desguace ecolóxico de automóbiles. O obxectivo do centro é a venta dos compoñentes dos vehículos e, ao mesmo tempo, a integración laboral de persoas con discapacidade.
O labor destes traballadores céntrase en someter aos vehículos a un proceso de descontaminación, segundo estipula a normativa europea en materia de protección do medio ambiente. Deste xeito, o cadro de persoal de Trameve encárgase de retirar aceites, valvulinas, baterías, líquidos de refrixeración, combustibles e todo aquilo que sexa contaminante.
No ano 2002, data na que comeza a súa actividade, o centro ten un cadro de persoal formado por 9 persoas, mentres que no ano 2005 o seu cadro de persoal aumentou máis dun 40%, ao estar formado por 17 traballadores.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
