Notas de prensa

A directora xeral de Relacións Laborais pide sensibilidade aos mozos galegos fronte á problemática da siniestralidade laboral

A directora xeral de Relacións Laborais da Consellería de Traballo, Pilar Cancela, inaugurou a xornada Semana Europea da Prevención, organizada pola Confederación de Empresarios de Galicia, que baixo o lema Crecer en Seguridade ten a finalidade de sensibilizar á xente moza da necesidade de tomar a prevención de riscos laborais como unha cuestión clave e decisiva no desenvolvemento do seu traballo diario.

Cancela sinalou que a prevención de riscos laborais é unha das preocupacións prioritarias da Consellería de Traballo, polo que “todas as actuacións que redunden nunha mellora neste eido son ben recibidas”.

Corresponde aos poderes públicos a tarefa de protexer a vida e a integridade física dos traballadores, deseñando un sistema eficaz de protección da seguridade e saúde laboral, no que conflúen ademais diferentes normativas de ámbito europeo, nacional e autonómico. Sen embargo, a directora fixo fincapé en que “esta tarefa non é posible realizala sen a colaboración de todos os axentes implicados nesa protección”.

Segundo Pilar Cancela, “os mozos menores de 25 anos constitúen o presente e o futuro da nosa forza de traballo, polo que nos corresponde a todos garantir que comecen a súa vida laboral dun xeito estable e seguro”.

A representante de Traballo apuntou os beneficios que se poden acadar “sempre e cando se preste atención a saúde e a seguridade dos traballadores”. Destacou que, por unha banda, unha boa xestión da seguridade no traballo é unha das características das organizacións xestionadas con eficacia e redunda en beneficio da empresa.

Por outro lado, apuntou que “formando e educando axeitadamente á xente moza a empresa pode beneficiarse da súa enerxía, entusiasmo e vontade de aprender á vez que se garante a súa seguridade no traballo”. Ademais, Cancela destacou que outro dos beneficios baséase na reputación como empresarios, xa que os modelos en seguridade e saúde laboral axudarán a atraer a traballadores de calidade.

Na súa intervención, a directora xeral de Relacións Laborais sinalou que a difusión dunha cultura de prevención é un elemento clave. Por iso “estanse a desenvolver nos Centros Provinciais de Seguridade e Saúde Laboral da Consellería xornadas de difusión entre o profesorado sobre a importancia da prevención, aproveitando o discorrer desta Semana Europea da Prevención”, explicou.

Sensibilización na Formación Profesional

Nese senso, estes primeiros plans de actuación en materia de prevención “seguiranse afianzando e desenvolvendo no tempo, complementados con campañas específicas para as alumnas e alumnos de formación profesional, traballadoras e traballadores de incorporación inminente ao mercado laboral e que na súa formación práctica xa están en contacto cos riscos inherentes á súa futura prestación no traballo”, asegurou a representante do departamento que dirixe Ricardo Varela.

Antes de rematar, Cancela recordou aos presentes no acto que, no seo do proceso de Diálogo Social, acordáronse dous grandes proxectos, como son “a creación do Instituto Galego de Seguridade e Saúde Laboral”, un organismo de carácter técnico que se encargará de levar adiante a coordinación e a realización das políticas de prevención en Galicia, e un segundo acordo, o Plan Estratéxico de Prevención de Riscos Laborais 2006-2010, que se configura como marco básico de actuación no eido da prevención en Galicia para os vindeiros anos. Segundo declarou a directora xeral, “ambos os dous acordos marcarán un antes e un despois para a seguridade e saúde laboral en Galicia”.