martes, 11 de agosto de 2026
O vicepresidente da Xunta, Anxo Quintana, participou en Compostela nun acto en memoria dos mestres represaliados durante a Guerra Civil e o Franquismo no que reivindicou a necesidade de rachar coa inxustiza da lousa de silencio que durante tantos anos pesou sobre a súa morte. Na homenaxe, organizada polo Seminario Galego de Educación para a Paz, o vicepresidente tivo un emotivo recordo na lembranza destes homes e mulleres que perderon a vida por defender os seus ideais e por pór os seus ideais ao servizo da cidadanía.
Anxo Quintana manifestou que a declaración do 2006 como Ano da Memoria é unha homenaxe do Goberno galego aos represaliados e símbolo do seu compromiso coa liberdade. Trátase dunha reivindicación e un chamamento para non esquecer o que pasou e homenaxear aos que padeceron a barbarie, que tiveron que sufrir unha dobre inxustiza: a dos actos en si mesmos e a do esquecemento. Para o vicepresidente, recordalos e homenaxealos é un xeito de mantelos vivos e de manter vivos os seus valores e, sobre todo, do que se trata é de lembrar o que pasou para que nunca máis volva suceder.
Na homenaxe, celebrada no Museo Pedagóxico de Galicia (Mupega) e na que tamén participaron a secretaria xeral de Política Lingüística, Marisol López, e o director xeral de Creación e Difusión Cultural, Luis Bará, os representantes do Seminario Galego de Educación para a Paz descubriron unha placa conmemorativa na memoria destes mestres.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
