Notas de prensa

O Concurso de Monólogos Monolingües esténdese ás tres Universidades galegas

Deste xeito, entre o 23 de outubro e o 23 de novembro os interesados deberán formalizar a súa inscrición para participar nesta actividade lúdica que persegue promover a reflexión sobre a situación e a problemática da lingua galega e dos seus falantes, tanto na vida universitaria como fóra dela, a partir das historias que conten. As solicitudes deben remitirse aos Servizos de Normalización Lingüística das tres Universidades.

O concurso presentouse esta mañá en San Xerome nunha roda de prensa na que participaron a secretaria xeral da USC, Isabel García-Rodeja; o vicerreitor de Extensión Universitaria e Comunicación da Universidade da Coruña, Luis Caparrós; o director da �rea de Normalización Lingüística da Universidade de Vigo, Enrique Costas; o director do Servizo de Normalización Lingüística da USC, Manuel Núñez Singala, e a responsable da �rea de Dinamización deste Servizo, Isabel Vaquero.

A ‘Vennos con contos’, actividade aínda que lúdica cun claro obxectivo de sensibilización cara á lingua galega, pode concorrer calquera membro da comunidade universitaria que, cunha duración máxima de 10 minutos e 5 de mínima, conten unha historia de creación propia sobre o uso do galego na vida cotiá. A representación do monólogo desenvolverase nun acto público a celebrar o 29 de novembro na Facultade de Dereito da USC.

Xurado e premios

O xurado do certame, que valorará tanto o contido da historia coma a propia maneira de contalo, estará formado por tres membros das Universidades organizadoras e dous persoeiros do mundo da cultura. O gañador do concurso recibirá 200 € en metálico, o que acade o segundo posto 150 € e 100 € para o terceiro, ademais dunha subscrición de balde a BIBLOS-Clube de Lectores por un ano xunto con tres vales para a adquisición de libros a través deste mesmo Clube (200 € ao primeiro, 150 € ao segundo e 100 € ao terceiro).

O certame organízao nesta edición as tres Universidades galegas coa colaboración da Secretaría Xeral de Política Lingüística da Xunta de Galicia e de Biblos Clube de Lectores

Éxito das anteriores edicións

Tanto a primeira coma a segunda edición deste certame de monólogos, que correron pola conta da Comisión de Normalización Lingüística da Facultade de Ciencias Económicas e Empresariais da USC, congregaron a centos de persoas que durante longo tempo gozaron e riron cos dezanove concursantes que desbordaron inxenio sobre o escenario.

Ao ser esta terceira edición aberta ás tres Universidades galegas, os organizadores contan con superar con creces as cifras de anos pasados, tanto de participantes coma de público.