sábado, 7 de noviembre de 2026
Así o deu a entender na cerimonia inaugural a responsábel da Comisión Internacional de Xénero da Vía Campesina, a dominicana Juana Ferrer, quen declarou que aínda persisten moitas limitacións que frean a participación e a toma de decisións das mulleres labregas, tanto no seo da Vía Campesina como noutros espazos de loita e resistencia, e nos máis diversos foros e eventos internacionais.
Aínda así, Ferrer valorou positivamente todo o camiño percorrido dende a fundación da Vía Campesina en 1992 en Mons (Bélxica), pero alertou de que aínda queda moito por facer para acadar a nosa integración e recoñecemento pleno. En contraste co padecemento dunha situación de marxinación e opresión das labregas no campo, Ferrer destacou a achega das mulleres campesiñas en feitos como o desenvolvemento do agro e das comunidades nas que vivimos; o descubrimento e protección das sementes; o coidado dos recursos; o fortalecemento da Vía Campesina no mundo; a loita pola soberanía alimentaria e pola terra; ou a resistencia fronte ás políticas neoliberais que destrúen as vidas, culturas, e a agricultura, e que nos obrigan a abandonar as nosas terras e a sermos emigrantes forzosas ás cidades e a outros países.
Na apertura do evento tamén participou a directora xeral de Cooperación Exterior da Xunta de Galiza, Fabiola Sotelo, que destacou a función deste congreso como espazo para escoitar, para descubrir outras realidades, para compartir e debater e, en definitiva, para avanzar. Sotelo destacou que a muller do medio rural en Galiza, e no mundo empobrecido, ten sido a protagonista oculta da cooperación ao desenvolvemento, e afirmou o seu convencemento de que no futuro, ese desenvolvemento e o progreso, ou se fan dende o recoñecemento e o liderado da muller, ou non serán factíbeis.
Pola súa banda, a secretaria xeral do Sindicato Labrego, Lidia Senra, que oficiou como anfitrioa, agradeceu a presenza de mulleres en representación das labregas de todo o mundo. Senra explicou que por primeira vez, mulleres da Vía Campesina vidas dende todos os puntos da terra imos abordar, de xeito colectivo, a nosa formación en feminismo. Moitas de nós levamos anos traballando a reo para que se recoñezan os dereitos das labregas; pero démonos conta da necesidade de coñecer o que significa o pensamento feminista, e que avances supuxo para a conquista dos nosos dereitos e para a nosa loita pola igualdade real.
Lidia Senra, ademais, agradeceu o apoio financeiro da Dirección Xeral de Cooperación Exterior, da Secretaría Xeral de Igualdade e da Deputación da Coruña, que estiveron representadas na xornada de hoxe por Fabiola Sotelo, Carme Adán e Margarida Vázquez Veras; amais da axuda económica do Servizo Galego de Igualdade. Esta primeira xornada do Congreso Mundial de Mulleres da Vía Campesina estivo centrada en contidos formativos ao redor do feminismo, e contou con relatorios de Carme Adán e María Xosé Agra.
Nota de prensa remitida polo Gabinete de Comunicación da Xunta de Galicia:
A Directora Xeral de Cooperación Exterior da Xunta de Galicia, Fabiola Sotelo, reivindicou o papel protagonista da muller nas actuacións a prol do desenvolvemento asegurando que ata o de agora se mantivo oculto, pero amosouse convencida de que no futuro, o desenvolvemento e o progreso ou se fan dende o recoñecemento e o liderado da muller ou non será factible.
Fabiola Sotelo fixo estas declaracións na inauguración do Congreso Mundial das Mulleres de Vía Campesiña. Labregas sementando a igualdade, organizado polo Sindicato Labrego Galego, a Coordinadora Labrega Europea e maila organización A Vía Campesiña, coa colaboración da Administración Autonómica e a Deputación da Coruña.
Este congreso desenvolverase en Santiago ata o sábado 21 de outubro e reúne a máis de cen mulleres procedentes de Honduras, México, Nicaragua, República Dominicana, Brasil, Bolivia, Vietnam, Corea, India, EE.UU., Suecia, Noruega, Austria, Francia e Holanda, ademais das orixinarias de Galicia e España. No acto de apertura participaron tamén a secretaria xeral do Sindicato Labrego Galego, Lidia Senra, e Juana Ferrer, representante de Vía Campesiña.
A directora xeral de Cooperación Exterior destacou a relevancia de que este encontro mundial teña lugar en Galicia e asegurou que no tempo que leva no cargo tivo ocasión de visitar e avaliar moitos e moi variados proxectos de cooperación ao desenvolvemento en diversos países e comprobar que en todos eles coinciden a fortaleza e a capacidade de loita das mulleres.
Así, destacou a importancia e o papel clave das mulleres na economía e na xestión dos recursos, na resolución de conflitos, na capacidade asociativa, na educación, na cultura e na saúde.
Nesta semana especial de rebelión e de loita contra a pobreza, -manifestou Sotelo- teño que lembrar que un dos Obxectivos do Milenio promove a igualdade entre homes e mulleres, así como a autonomía da muller. Nesta liña, avogou porque se facilite esta igualdade a través do acceso das nenas á ensinanza en verdadeiras condicións de igualdade.
Queda pouco para o 2015, dixo, e a aposta pola erradicación do analfabetismo feminino ten que ser clara e contundente explicando que para poder elixir as mulleres teñen que ser quen de ollar as diferentes opcións e camiños que a vida nos pon por diante
A directora xeral de Cooperación Exterior reiterou o compromiso do Goberno galego coas mulleres, asegurando que a Xunta de Galicia está a apoialas nos seus esforzos, nos seus desvelos e denunciando as aínda terribles situacións ás que con demasiada frecuencia se teñen que enfrontar.
O Congreso Mundial de Mulleres Vía Campesiña, inaugurado en Santiago analiza a situación na que viven e traballan as mulleres no medio rural en xeral, e as que se dedican á actividade agraria en particular. Con este encontro, preténdese propiciar a formación das participantes no pensamento feminista e contribuír á cooperación entre delegacións e asociacións para articular a loita contra a violencia de xénero e a discriminación no acceso aos medios de produción, segundo explicou a secretaria xeral do Sindicato Labrego Galego, Lidia Senra.
Nel participan máis de cen mulleres en representación de diversos organizacións labregas galegas, españolas, europeas e doutros países e de organizacións mixtas integradas na Vía Campesiña.
A Secretaria Xeral do Sindicato Labrego Galego, Lidia Senra, abriu o acto de inauguración referíndose á importancia de que labregas de todos os continentes se poidan reunir para compartir experiencias e debater acerca da situación das mulleres no mundo e as posibles vías para mellorala.
Pola súa banda, Juana Ferrer, representante da Comisión Internacional da Vía Campesiña, finalizou a súa intervención dicindo que as mulleres non estamos en proceso de conquista dos dereitos, senón que xa estamos en posesión deles e que agora o que hai é que defendelos. Na súa intervención no acto de inauguración, Ferrer fixo fincapé na longa loita e resistencia que de sempre as mulleres tiveron que sufrir para defender os seus dereitos, nomeadamente as campesiñas. Neste sentido, explicou que estes días en Compostela serán un espazo fundamental para rearticular a axenda en beneficio dos obxectivos que as mulleres da Vía Campesiña buscan concretar.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
