Notas de prensa

Dez centros galegos realizarán este curso proxectos de innovación educativa para incorporar as TICS á educación

A Consellería de Educación e Ordenación Universitaria convocou o pasado 31 de maio axudas para a realización de proxectos de innovación educativa para a incorporación das tecnoloxías da información e a comunicación (TIC) á educación para o curso 2006/2007. Desta convocatoria resultaron beneficiados un total de 10 centros de ensino galegos. Na provincia de A Coruña foron seleccionados o Centro Público Integrado (CPI) de San Sadurniño; os Institutos de Educación Secundaria (IES) Lamas de Castelo, de Carnota; Agra do Orzán, de A Coruña; Ricardo Carballo Calero, de Ferrol; e o Colexio de Educación Infantil e Primaria (CEIP) de Arzúa. Na provincia de Lugo, participará nesta iniciativa o IES Nosa Señora dos Ollos Grandes, do concello de Lugo; e, na de Ourense, farao o IES de Celanova. Pola súa banda, os centros que resultaron seleccionados na provincia de Pontevedra foron os IES Aquis Celenis, de Caldas de Reis; Pazo da Mercé, de As Neves; e o Colexio de Educación Primaria (CEP) de Redondela.

Estes centros recibirán este curso por parte da Administración educativa galega os seguintes apoios de cara ao desenvolvemento do seu proxecto: un kit multimedia composto por un encerado dixital interactivo, un proxector e seis ordenadores portátiles; unha dotación económica de 1.000 euros; formación en TIC e asesoramento para o profesorado do centro para un mellor aproveitamento dos recursos informáticos e da súa incorporación á docencia; e un espazo web para facilitar a creación e organización de materiais e recursos educativos por medio das TIC.

Este programa, posto en marcha pola Consellería de Educación, dá conta da política deste departamento para favorecer o acceso ás tecnoloxías da información e a comunicación en igualdade de condicións para toda a poboación escolar, así como o apoio ao desenvolvemento docente que demanda novos perfís profesionais que supoñen un desafío constante e crecente cara ao concepto da aprendizaxe ao longo de toda a vida.

Características do proxecto

Os proxectos seleccionados recollen os obxectivos que, a curto e longo prazo, se pretenden alcanzar; o desenvolvemento da proposta metodolóxica e de actividades, os contidos que se van desenvolver e a avaliación, para cada unha das áreas de coñecemento ou materias ás que o proxecto faga referencia.

Ao mesmo tempo, os centros participantes presentaron proxectos nos que estaba presente o tratamento da diversidade e a atención ao alumnado con necesidades específicas de apoio educativo, así como as medidas para promover a súa utilización en igualdade de condicións por parte dos diferentes sexos; o fomento dos valores democráticos e a potenciación do uso da biblioteca escolar como centro de recursos para a lectura, a información e a aprendizaxe. Ademais, na redacción dos proxectos incluíuse a utilización dos recursos TIC existentes no centro, a organización dos espazos do centro, o plan de avaliación e o de formación do profesorado para a óptima execución do proxecto, e as medidas proxectadas para difundilo entre o alumnado, as familias e a comunidade de cara a fomentar a súa participación e o aproveitamento das TIC.

Implicación do proxecto na mellora das prácticas escolares
Un dos criterios de selección foi a viabilidade do proxecto, isto é, a experiencia previa na participación e desenvolvemento de proxectos de innovación e/ou formación e experiencia en TIC por parte do centros e dos participantes; o grao de compromiso do centro e da comunidade educativa no desenvolvemento do seu proxecto e a súa implicación na mellora das prácticas escolares; o compromiso do profesorado coa formación no uso das TIC e coa realización de actuacións de formación durante o desenvolvemento do proxecto; a utilización dos equipamentos informáticos dispoñibles con anterioridade no centro; a garantía de continuidade do proxecto; e a medición da satisfacción e mecanismos de incorporación de suxestións dos participantes.

A participación do profesorado implicado no proxecto acreditarase a través da certificación en calidade de coordinador/a ou membro no proxecto de innovación educativa cunha duración de 50 horas. As funcións do coordinador/a pasan por asesorar ao profesorado do centro durante o desenvolvemento do proxecto; establecer canles para a difusión da experiencia e o intercambio de información entre a comunidade educativa e con outros centros; e impulsar actuacións tendentes á ampliación e mellora do proxecto.

No mesmo senso, o coordinador/a deberá orientar ao profesorado do centro sobre os recursos dispoñibles en Internet e no espazo web do centro; fomentar a creación de contidos educativos polo profesorado do centro e a súa difusión a toda a comunidade educativa; administrar as ferramentas educativas e facilitar a súa utilización polo profesorado; administrar e actualizar o espazo web do centro e coordinar o seu funcionamento. Ademais, terá que actuar de enlace entre o centro educativo e o Equipo de Contidos Educativos da Consellería de Educación e Ordenación Universitaria, así como no Centro de Formación e Recursos do seu ámbito.

Un dos principais obxectivos da Administración educativa
O fomento das Tecnoloxías da Información e da Comunicación no ensino é un dos obxectivos fundamentais da Consellería de Educación e Ordenación Universitaria. A Administración educativa autonómica considera a competencia dixital como unha das claves para a aprendizaxe ao longo da vida, xa que é unha das que forman a base para o desenvolvemento e utilización do resto das competencias definidas e consideradas pola Unión Europea como aquelas que todas as persoas necesitan para a súa realización persoal, así como para a cidadanía activa, a inclusión social e o emprego.

O uso das tecnoloxías dixitais con fins educativos abre novas dimensións e posibilidades nos procesos de aprendizaxe, dado que ofertan unha grande cantidade de información interconectada para que o usuario a manipule; e permiten unha maior individualización e flexibilización no proceso educativo, adecuándoo ás necesidades particulares de cada individuo.

Así mesmo, representan e transmiten información a través de múltiples formas expresivas e motivadoras, axudan a superar as limitacións temporais e as distancias xeográficas entre docentes e alumnado e, deste xeito, facilitan estender a formación máis alá das formas tradicionais do ensino presencial. Por outra banda, as TIC son elementos que facilitan a comunicación a través dunhas ferramentas de doado uso, o cal as converte en especialmente útiles para o alumnado, o profesorado e tamén para as familias e outros axentes da comunidade educativa.