sábado, 7 de noviembre de 2026
O vicepresidente da Xunta, Anxo Quintana, destacou a importante contribución que o político Pancho Allegue fixo ao municipio de Fene. Para Quintana, o traballo de Allegue fixo posible a mellora da calidade de vida dos seus veciños, a consecución de maiores índices de benestar e de progreso para a súa comunidade, porque esa foi a gran teima da súa vida.
Anxo Quintana realizou estas declaracións nunha homenaxe celebrado en Fene ao político Pancho Allegue, ao cumprirse un ano do o seu pasamento. No decurso do acto o vicepresidente da Xunta lembrou a figura de Allegue, con quen compartiu militancia e proxecto político, e cualificouno como un loitador incansable, un home imprescindible. Por iso, a xuízo de Quintana, logo do seu pasamento, Allegue entrou a formar parte da memoria e da historia de Fene, porque o seu compromiso cos demais proporcionoulle o cariño do pobo, da súa xente.
Así, Quintana fixo referencia ao traballo desenvolvido por Pancho Allegue na loita pola defensa dos dereitos das persoas, que o levou a opoñerse aos plans de reconversión naval e á busca de medidas compensatorias para os concellos afectados. Esta actividade trasladouse logo ao eido do movemento cidadán e na defensa do sector agrario galego e dos proxectos políticos municipais. Todo o traballo desenvolvido por Allegue tiña, segundo explicou Quintana, unha única finalidade: acadar un futuro mellor para os mozos e mozas do seu pobo, da súa comarca e do seu país. Todos aqueles que o coñeciamos sabemos da súa actitude xenerosa, solidaria, antepoñendo sempre o proxecto colectivo ao persoal, o benestar do pobo ao seu propio, sinalou o vicepresidente.
Ao cumprirse un ano da morte de Pancho Allegue, Anxo Quintana apostou por recuperar os seus valores como persoa e como político, porque, a pesar da súa morte, queda a súa memoria, a súa entrega e a súa convición de que co esforzo e o traballo se poden mellorar as cousas.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
