viernes, 14 de agosto de 2026
A XIX edición do Ferrolterra Pantín Clasic, que ten lugar entre os días 7 e 10 de setembro, foi presentado na Dirección Xeral para o Deporte, patrocinadora dun evento que reúne a centos de surfeiros no Concello de Valdoviño.
O director xeral para o Deporte, Santiago Domínguez Olveira, destacou o traballo do club organizador, que favorece a participación de deportistas galegos nesta competición internacional: É de agradecer ese esforzo para apoiar a base galega. É unha grande idea que os nosos surfeiros poidan participar e se lles dean todas as facilidades, xa que esa é a forma de elevar o nivel do noso deporte de base.
Pola súa parte, o presidente do Océano Surf Club, Jesús Busto, destacou que esta proba é tamén un escaparate para a difusión dunha Galiza moderna e nova, do século XXI. Precisamente, esa é unha das características que o máximo responsábel do deporte galego destacou que esta proba permite mostrar ao exterior unha Galiza moderna, sorprendente e áxil. En Galiza contamos cos medios necesarios para organizar actividades deste tipo e por iso animo a todo o mundo a achegarse a Pantín para ver aos mellores surfeiros do mundo.
A alcaldesa de Valdoviño, Concepción Sanesteban, felicitou ao club organizador pola súa historia e destacou que para o seu municipio ademais do valor deportivo que ten, esta proba ofrece unha gran pantalla cara ao mundo. Ademais, cada vez son máis os nenos e nenas que practican este deporte nas nosas praias.
A día de hoxe hai 120 participantes inscritos, aínda que a organización confía en que se poidan alcanzar os 200 xa que o prazo de inscrición segue aberto. A proba masculina é clasificatoria para o Campionato do Mundo de Surf, mentres que no caso das mulleres é puntuábel para o Campionato de Europa. A categoría do campionato será de tres estrelas, tanto na proba masculina como na feminina, cun importe en premios de 60.000 euros.
A participación galega é a máis numerosa con máis de trinta surfeiros, destacando o ferrolán Luis Rodríguez e o vigués Gonzalo Zubizarreta, que teñen un bo nivel para loitar polos primeiros postos.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
