viernes, 14 de agosto de 2026
Dende o día 3 ata o 27 de agosto o Museo do Pobo Galego presenta a exposición correspondente ao Certamen de fotografía sobre cultura popular, nas edicións 2004 e 2005.
Este certame, que o Ministerio de Cultura convoca anualmente desde 2001, pretende, a través da exposición itinerante que organiza o Museo del Traje C.I.P.E., dar a coñecer o traballo dos artistas premiados e seleccionados polo xurado, entre todos aqueles traballos presentados.
Na edición de 2004 o primeiro premio recaeu na reportaxe Peches, de Luís Higinio Flores Rivas, que ten colaborado co Museo do Pobo Galego na montaxe de varias exposicións. Os premios segundo e terceiro recaeron, respectivamente, en Eduardo Arrillaga Santolaya por El bolo e en Manuel Jesús Ojeda Camacho por Cacerías populares.
Nos tres primeiros premios de 2005 están presentes aspectos asociados ao mundo dos rituais ou ao ámbito festivo. O primeiro premio outorgóuselle a María Auxiliadora Zamora Moya pola obra El día de los difuntos; o segundo a Andrés Guillermo Marín Garijo, por Las cruces de mayo en Berrocal, e o terceiro a Carlos Verdú Belda, por Primera recreación histórica de las batallas de Castalla, 1812 y 1813.
As fotografías seleccionadas en ambas as convocatorias amplían o repertorio temático abordando, entre outros motivos, o traballo de pastores e pescadores, o mundo dos artesáns, os produtos de fabricación industrial, como os xoguetes de Ibi, o carnaval de Laza, a arquitectura popular, o ritual das pedras en Muxía... Tamén atopamos fotografías que tratan aspectos característicos das formas de vida da nosa época: as alusións ás fases da vida, por exemplo, únense a temas como os graffiti ou a reciclaxe de produtos de refugallo.
A exposición do Certamen de fotografía sobre cultura popular debuxa, pois, un mosaico de temas que reflicte unha parte da realidade peninsular de comezos do século XXI.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
