viernes, 14 de agosto de 2026
O conselleiro de Innovación e Industria, Fernando Blanco Álvarez, anunciou que o seu departamento levará á vindeira reunión do Consello da Xunta unha proposta, consensuada co sector turístico, para habilitar con carácter extraordinario unha partida de 3 millóns de euros que se destinarán a realizar campañas de promoción de Galiza como destino e a compensar as perdas sufridas polo turismo galego por mor dos incendios dos últimos días.
O titular de Innovación e Industria, que visitou hoxe varios establecementos que foron directamente afectados polos lumes, explicou que estes fondos servirán para financiar unha nova campaña de promoción que está previsto que se inicie durante a vindeira semana en medios de comunicación de todo o Estado, coa fin, segundo explicou Fernando Blanco, de manter a afluencia de visitantes a Galiza tralo impacto negativo dos incendios.
Bo destino turístico
En relación con esta circunstancia, o conselleiro recoñeceu que o turismo galego viviu estes días unha situación difícil, pero que Galiza segue sendo un bo destino turístico, cunha oferta de calidade en ámbitos como a cultura ou a gastronomía. Engadiu que non podemos negar que se queimaron 77.000 hectáreas de terreo, pero tamén é certo que iso supón o 2,5% do territorio galego, polo que aínda queda moito para visitar.
O conselleiro de Innovación e Industria coñeceu de primeira man a incidencia dos lumes no sector turístico galego, visitando o cámping Ría de Arousa 2, na parroquia de Oleiros, en Ribeira, e as casas de turismo rural Os Muíños e Casa da Ermida, ambas no Araño (Rianxo). Estivo acompañado polo director xeral de Turismo, Rubén Lois González, polo xerente de Turgalicia, Xesús Pereira, e por representantes da Confederación de Empresarios de Hostelería de Galiza (CEHOSGA), a Asociación de Cámpings de Galiza e de asociacións de turismo rural do país.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
