domingo, 8 de noviembre de 2026
O presidente da Xunta, Emilio Pérez Touriño, salientou que o maior capital político que hoxe ten o galego é o consenso social xerado arredor da súa necesidade e do seu valor, un consenso que, segundo salientou, en moitos casos, vai mesmo máis alá das prácticas lingüísticas individuais, para ancorarse no terreo do afectivo e da vontade identitaria da sociedade galega.
Na súa intervención durante o acto organizado con motivo da celebración do Día das Letras Galegas 2006, na Casa-Museo de Rosalía de Castro, lugar no que quere reanudar o Goberno da Xunta de Galicia a súa celebración anual do Día das Letras Galegas, Emilio Pérez Touriño manifestouse consciente de que a situación da lingua galega presenta dificultades concretas que hai que avaliar, pero sen botarlle a culpa a ninguén, xa que esta non é a mellor maneira de mellorar a situación do idioma. Neste sentido, recoñeceu que aínda estamos lonxe de acadar os niveis de normalidade que necesita o galego. Hai problemas, algúns de grande importancia, para que poidamos considerar pechado o proceso normalizador, que non consiste nun proceso de substitución lingüística, pero si na consecución dunha presenza normal e libre do galego en todos os eidos da nosa vida pública e no pleno respecto aos dereitos lingüísticos dos galegofalantes, asegurou.
Non obstante, incidiu no consenso social xerado arredor da lingua galega, un consenso que tivo o seu reflexo político na aprobación por unanimidade da Lei de Normalización Lingüística e do Plan Xeral de Normalización.
Estas leis, segundo indicou o xefe do Executivo galego, van permitir que desde a Xunta se leven a cabo iniciativas no eido do ensino, nos servizos sociais, nas telecomunicacións e no ámbito da administración de xustiza en relación coa normalización lingüística.
Así mesmo, a normativa vai permitir que medidas desa índole se estendan a outros campos da vida pública e que se desenvolvan e se fortalezan moitos dereitos lingüísticos dos cidadáns e a consideración xurídica da lingua galega na reforma do Estatuto de Autonomía.
O máximo mandatario autonómico fixo un chamamento para que a política lingüística non sexa obxecto de confrontación partidaria. A política lingüística en Galicia, fágaa o Goberno que o faga, non debería ser obxecto de confrontación partidaria, máis alá das lóxicas discrepancias de matices sobre os ritmos e prioridades na aplicación desa política, asegurou. Só desta maneira, aseverou, reflectiríase que se trata dun asunto considerado crucial pola cidadanía e polas forzas políticas que a representan.
Unha lingua para todos
O máximo mandatario da Xunta asegurou, ademais, que ao igual que non se van tolerar discriminacións por razóns lingüísticas alleas a toda legalidade tampouco podemos facer caer sobre a lingua galega estigmas novos, que dificulten a súa expansión social e o seu uso seguro e non conflictivo por parte dos individuos. O presidente afirmou que non podemos caer no erro de connotar a lingua con novos marcadores políticos ou ideolóxicos se queremos que a lingua sexa de todos e para todos.
Nesta liña, o titular da Administración autonómica incidiu en que non só é preciso tomar medidas efectivas e poñer en práctica políticas lingüísticas activas e eficaces, senón tamén conxugar co conxunto da sociedade un discurso lingüístico renovado. Realista, desde logo, porque o engano e o autogoberno son as peores políticas, pero tamén optimista e esperanzado, aseverou.
Así mesmo, manifestou o seu convencemento e o do Goberno da Xunta no futuro e no presente do galego. Quero transmitirlles a plena convicción do Goberno da Xunta de Galicia no futuro do galego. E tamén no seu presente, porque é un idioma vivo, operativo, valioso e eficaz como arma de comunicación, non só entre nós, senón tamén con moitos outros pobos do mundo, concluíu.
Loa a Lugrís
Durante o acto de conmemoración do Día das Letras Galegas, o presidente da Xunta lembrou o centenario da Real Academia Galega, organismo que instituíu o Día das Letras Galegas no ano 1963. Pérez Touriño sinalou que, desde entón, Galicia foi incrementando a conciencia de si mesma.
O presidente da Xunta tamén valorou a figura de Manuel Lugrís no acto que realizou o Goberno autonómico con motivo do Día das Letras Galegas, salientando que foi un símbolo e un compendio de toda a etapa do galeguismo, unha época que vai desde a derradeira década do século XIX ata a eclosión renovadora e decisiva da Xeración Nós.
Pérez Touriño referiuse a Lugrís como un deses homes que tivo que multiplicarse para poder atender ao moito que había que facer no campo da lingua, da cultura e da política galegas. Lugrís, explicou o titular do Goberno galego, fíxoo nun momento histórico no que a modernización en curso e o incipiente, pero xa firme proceso urbanizador ameazaba con pechar para sempre no mundo rural a lingua e a cultura galegas.
Neste sentido, explicou Touriño, o homenaxeado deste ano no Día das Letras Galegas, afrontou o desafío impulsando o teatro en galego nos coliseos das cidades, escribindo na prensa, contribuíndo á creación das Irmandades da Fala, participando na fundación da Real Academia Galega e formando parte do equipo redactor do anteproxecto de Estatuto de Autonomía de 1932 e tamén do de 1936, entre outras actividades destacadas en defensa da lingua.
Por último, o titular do Executivo autonómico afirmou que o Día das Letras Galegas é o Día da Lingua galega, xa que é a data na que a sociedade galega mira con máis intensidade e dunha maneira máis reflexiva o estado da lingua e da súa cultura.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
