sábado, 27 de diciembre de 2025
A nova instalación do Centro de Investigacións Agrarias de Mabegondo (CIAM) alcanza a clasificación ISO-7, o que permitirá traballar con axentes biolóxicos do grupo 3, aqueles que poden causar unha enfermidade grave no home e presentan un serio perigo para os traballadores, con risco de que se propague á colectividade e sen que exista xeralmente unha profilaxe ou tratamento eficaz. O animalario dispón dunha antesala-vestiario, dunha sala en presión negativa con extracción forzada e filtro HEPA de saída.
Na actualidade, o Laboratorio de Parasitoloxía do CIAM configúrase como unha Unidade de investigación, asesoramento e difusión da información, nas áreas científicas e técnicas relacionadas coas enfermidades parasitarias, explicou o investigador Xosé Antonio Castro Hermida. Especialmente no relativo ás zoonoses (enfermidade que pode transmitirse de animais ao home e viceversa), que ten grande importancia económica desde o punto de vista da produción animal. Esta unidade pretende desenvolver servizos, a través da asistencia técnica, e transferir a tecnoloxía necesaria aos profesionais da sanidade animal así como ao sector agroalimentario en Galiza, sinalou Castro Hermida.
O Laboratorio de Parasitoloxía está situado no primeiro andar do departamento de produción animal do Centro de Investigacións Agrarias de Mabegondo. O animalario deste laboratorio é unha instalación científica especialmente adecuada para os proxectos de I+D. Calquera grupo de investigación do CIAM, así como o persoal doutras entidades académicas ou industriais, terán a súa disposición este animalario ISO-7 sempre baixo a supervisión de investigadores ou técnicos cualificados, para garantir a súa adecuada utilización.
O laboratorio desenvolve diversas liñas de investigación básicas e aplicadas relacionadas co diagnóstico, prevención e epidemioloxía de parasitoses que lles afectan aos animais domésticos, silvestres e ao home. Na actualidade, existen tres liñas de investigación dedicadas a examinar cinco enfermidades parasitarias de enorme interese en sanidade animal e humana como son a neosporose e toxoplasmose cun equipo dirixido pola Dra. Marta González Warleta, a cryptosporidiose e a giardiose, dirixido polo Dr. Xosé Antonio Castro Hermida, e a fasciolose, dirixido pola Dra. Mercedes Mezo Menéndez.
Entre estas liñas de traballo destacan a epidemioloxía clásica, molecular e control de parasitoses animais e humanas, inmunodiagnóstico, parasitoloxía celular, parasitoloxía molecular de protozoos e helmintos, quimioterapia experimental in vitro e in vivo: cribado e valoración da actividade antiparasitaria de novas moléculas.
Nesta liña, a asistencia técnica e os servizos enfócanse cara o diagnóstico de parasitismos por protozoos, nematodos, cestodos e trematodos a nivel gastrointestinal, pulmonar e hepático en animais domésticos e silvestres mediante a realización de análises coproparasitolóxicos cuantitativos e cualitativos, produción de antíxenos parasitarios e de anticorpos monoclonais de utilidade para inmunodiagnóstico e aplicación de técnicas de bioloxía molecular.
Outros estudos enfócanse cara a detección de formas parasitarias no medio ambiente e investígase a súa viabilidade, infectividade e virulencia. Os traballos epidemiolóxicos están encamiñados á determinación de factores de incidencia en saúde pública, estudos de vixilancia e control das zoonoses parasitarias e dos seus axentes zoonóticos co fin de aplicar programas preventivos das enfermidades parasitarias. Ademais, avalíase a actividade antiparasitaria de moléculas e facilítase o apoio científico-técnico e a formación especializada dos profesionais do sector sanitario e agropecuario
Cerca do 90% das empresas galegas con máis de 10 persoas empregadas utiliza aplicacións de software libre e a porcentaxe é de máis do 67% no caso das microempresas. Os datos forman parte do estudo O Software Libre nas Empresas de Galicia elaborado polo Observatorio da Sociedade da Información en Galicia (Osimga), adscrito á Axencia para a Modernización Tecnolóxica de Galicia. Os datos proceden da Enquisa sobre o uso de TIC e comercio electrónico nas empresas, que realiza o INE anualmente, que cede os datos a OSIMGA en virtude do convenio de colaboración. Entre os programas máis utilizados destacan os navegadores de Internet (95,5%), as aplicacións ofimáticas (75,3%) e os sistemas operativos libres (51,5%).
A Consellería de Sanidade publica, na súa páxina web, o informe de actividade das infeccións respiratorias agudas correspondente á semana do 15 ao 21 de decembro, que sinala que a actividade gripal en Galicia continúa con intensidade media e con tendencia decrecente. Segundo os datos recollidos polo servizo de vixilancia epidemiolóxica da Dirección Xeral de Saúde Pública, xa se acadou o pico da onda epidémica da gripe. Respecto da semana anterior, rexístrase un descenso na taxa de consultas por gripe en atención primaria dun 5 %.
