Notas de prensa

Manuel Fraga destaca a solidariedade e a cohesión económica e territorial como os principios básicos para o acordo no proceso de construcción europea

O presidente da Xunta de Galicia recibiu á Delegación da Comisión de Desenvolvemento Rexional do Parlamento Europeo, á que lle deu a benvida desexando que a visita “amosase o esforzo realizado polos galegos para acadar maiores cotas de desenvolvemento e progreso”. � xuntanza tamén asistiron o conselleiro de Economía e Facenda, Xosé Antón Orza, e o secretario xeral para as Relacións coa UE e Acción Exterior, Jesús Gamallo.

O mandatario galego afirmou ter “a firme convicción” de que o rexeitamento do Tratado constitucional europeo en “sendas consultas populares” e o “fracaso do Consello Europeo”, celebrado en xuño, serán superados pola Unión Europea. Para iso “a solidariedade e a cohesión económica e territorial han de ser”, sinalou, “as columnas do acordo final, en consonancia cos principios que inspiran á Unión”. Manuel Fraga apostou pola continuidade de Europa como conxunto porque, lonxe de ser só “un mercado e uns acordos económicos”, é tamén “garantía” de “paz” e “estabilidade”; e referiuse tamén, á superación, no pasado, de moitas crises europeas que remataron co achegamento das “a miúdo, antagónicas posicións dos diferentes Estados membros”.

PERSPECTIVAS FINANCEIRAS PARA O PER�ODO 2007-2013

O titular do Goberno galego destacou a condición dos galegos como “europeístas leais”, que é a que “impulsa a defender que Europa precisa contar con máis recursos comúns para desenvolver as políticas que esixen os cidadáns, e para afrontar con éxito os retos da globalización”. De aí a necesidade do consenso nas Persepectivas Financieiras para o período 2007-2013, xa que das mesmas dependerá que “a Unión dispoña de medios financeiros para cumprir dunha maneira axeitada as súas políticas”.

En concreto, Manuel Fraga sinalou e apoiou o “loable obxectivo europeo” que convirte aos novos membros da Unión nos “principais beneficiarios da política rexional”. Sen embargo, precisou a necesidade de dispoñer dunha “axeitada financiación” que asegure tamén a continuación do apoio prestado “ás rexións dos antigos quince Estados membros que se benefician na actualidade das axudas europeas”.

OS FONDOS EUROPEOS EN GALICIA

Manuel Fraga recordou ante a Delegación da Comisión de Desenvolvemento Rexional do Parlamento Europeo que “Galicia cumpriu escrupulosamente as súas obligacións”. Así, fixo referencia aos informes da Comisión Europea que constatan que “tanto o Goberno da Xunta como a sociedade civil galega, acreditaron unha utilización óptima dos fondos europeos”. Como exemplo desta realidade, o titular da Xunta citou a visita levada a cabo polos integrantes da Delegación á planta de tratamento de residuos de SOGAMA e a cooperación existente entre Galicia e a Rexión Norte de Portugal, rexión transfronteiriza que contribúe “á consolidación do entramado territorial e social europeo”.

O mandatario galego rematou a súa intervención coa promesa de continuar a traballar “como viñen facendo durante todo o meu mandato como presidente da Xunta de Galicia, para edificar unha Europa máis europea, é dicir, máis integrada, cohesionada e solidaria”.

Gerardo Galeote, presidente da Comisión de Desenvolvemento Rexional do Parlamento Europeo, coincidiu con Manuel Fraga en remarcar a importancia da cohesión no proceso de construción da UE, destacando que a Comisión sempre a considerou un “piar consubstancial” dese proceso. Ademais, quixo agradecer a posibilidade de se reunir co titular do Executivo galego, sinalando que as diferentes xuntanzas mantidas pola Comisión na súa visita de dous días a Galicia resultaron “moi fructíferas”. Galeote aproveitou a ocasión para expresar “o máis profundo” dos seus recoñecementos á traxectoria política de Manuel Fraga, á súa dedicación a Galicia e ao seu papel na integración da Unión Europea.