Notas de prensa

A arqueoloxía regresa a San Cibrán para descubrir como era unha das maiores fortalezas da Alta Idade Media galega

Entre o 13 e o 31 de xullo desenvolverase unha nova campaña de escavación arqueolóxica no Alto de San Cibrán, entre os concellos de Ponteareas e Salceda de Caselas, no marco do proxecto de investigación Castelos no Aire. A intervención dará continuidade aos traballos iniciados en 2024, que permitiron identificar este enclave como un dos centros fortificados máis relevantes da Alta Idade Media na contorna do río Miño.

A campaña forma parte do proxecto de investigación ‘Estratexias de Control Territorial na Gallaecia Altomedieval (ConTroGAL)’, dirixido polo investigador Mario Pereiro Fernández (SÍNCRISIS-CISPAC, Universidade de Santiago de Compostela), e está financiada polos concellos de Ponteareas e Salceda de Caselas. Ademais, conta coa colaboración das Comunidades de Montes de Guláns e da Picoña, propietarias dos terreos onde se localiza o xacemento. Estes traballos estarán dirixidos por Mario Pereiro e contarán coa participación de persoal técnico da empresa Tempos Arqueólogos, especializada en intervencións arqueolóxicas, así como con estudantes do Grao en Historia da USC, reforzando o carácter investigador e formativo da campaña.

Nesta ocasión, a escavación centrarase en varios edificios situados na zona central do asentamento. O principal obxectivo é ampliar o coñecemento da súa organización urbanística, comprender mellor a relación entre as distintas construcións documentadas e contrastar a hipótese cronolóxica formulada a partir dos resultados obtidos durante a campaña de 2024. "Os primeiros traballos permitiron confirmar que San Cibrán é un enclave de enorme relevancia para comprender a organización do territorio durante os séculos finais da Alta Idade Media. Agora queremos coñecer como estaba estruturado o espazo habitado e que función desempeñaba cada un dos edificios que estamos a documentar", explica o director da intervención, Mario Pereiro.

O investigador destaca tamén que "cada nova campaña achega información fundamental para reconstruír un período da historia de Galicia que continúa sendo pouco coñecido desde o punto de vista arqueolóxico. San Cibrán está a ofrecer unha oportunidade excepcional para comprender como se organizaban estes grandes centros fortificados e cal era o seu papel na articulación do territorio".

Como en todas as intervencións do proxecto Castelos no Aire, a escavación desenvolverase baixo a iniciativa ‘Aberto por Obras’, que permite ao público visitar o xacemento durante os traballos arqueolóxicos. Todas as persoas interesadas poderán achegarse para coñecer de primeira man o desenvolvemento da escavación e conversar co equipo investigador sobre os avances da campaña.

Coa continuidade das investigacións, o Alto de San Cibrán consolídase como un dos xacementos altomedievais máis interesantes para o estudo da organización política e territorial dos séculos finais da Alta Idade Media no sur de Galicia.

Universidade de Santiago de Compostela (USC), 2026-07-10

Actualidad

Foto del resto de noticias (20261111-xunta.jpg) Celébrase o XIV pleno do Consello de Comunidades Galegas, do que sairá elixida a súa nova Comisión Delegada, composta por 13 entidades de España, Europa e América, coa misión de traballar polos intereses dos galegos na diáspora durante os vindeiros tres anos. Na inauguración do Consello foron homenaxeados catro galegos pola súa contribución a estreitar lazos entre Galicia e o Brasil. Os recoñecidos son a presidenta da Sociedade Hispano Brasileira de Socorros Mútuos e Instruçao, María Dolores Daparte; o presidente da Sociedade de Socorros Mútuos e Beneficiente Rosalía de Castro, Casto Vieites; a expresidenta da asociación Recreo de Anciáns da Vellez Desamparada, Regina Jallas, e a voluntaria e colaboradora da Asociación Cultural Hispano-gallega Caballeros de Santiago, de Salvador de Bahía, Lourdes Valencia.
Foto de la tercera plana (circo-camino-2026.jpg) Foi presentada na Cidade da Cultura a iniciativa 'Circo no Camiño', que celebrará entre o 12 de novembro e o 6 de decembro a súa primeira edición, na que contará con artistas nacionais e internacionais. A proposta Circo no Camiño quere achegar as artes escénicas a diferentes localidades galegas relacionadas co Camiño de Santiago. Para isto avanza unha programación variada de espectáculos de circo, maxia, música, acrobacias, humor e animación de rúa dirixidos a todos os públicos, que se desenvolverán tanto nunha gran carpa como nas rúas.En concreto, a programación desenvolverase en catro localidades galegas: Verín, Lalín, A Estrada e Santiago de Compostela, onde se pechará a programación, entre os días 3 e o 6 de decembro.

Notas

O festival EmigraSON pecha o cartel para a súa quinta edición, que se celebrará en Bruxelas os días 5 e 6 de marzo de 2027. As últimas incorporacións son Carlangas, 9Louro e Tapa D’Orella, ademais da Asociación Cultural Galega A Roda, de Lausanne, que protagonizará a foliada da primeira xornada. Carlos Pereiro, máis coñecido como Carlangas, é un músico orixinario de Monterroso pero compostelán de adopción. Alí fundou en 2007 Novedades Carminha, unha das bandas galegas máis exitosas das últimas décadas coa que publicou cinco álbumes ata a súa disolución en 2022.
A IA converteuse nun dos fenómenos con maior impacto social dos últimos anos, xerando ao mesmo tempo novas oportunidades e importantes interrogantes éticos, sociais e legais. As súas aplicacións están a transformar ámbitos como a educación, a comunicación, o acceso á información, o emprego ou a toma de decisións. Ao mesmo tempo, o seu avance vai acompañado de relatos, mensaxes e informacións que contribúen a facer pasar por verdade aquilo que non o é.
PUBLICIDAD
ACTUALIDAD GALICIADIGITAL
Blog de GaliciaDigital
HOMENAXES EGERIA
PUBLICACIONES