Notas de prensa

Só unha de cada oito empresas galegas conta cunha política formal de xestión do risco

A investigación, realizada polo catedrático de Economía Financeira e Contabilidade Luis Otero González e polo vicerreitor de Economía, Infraestruturas e Sostibilidade da USC, Pablo Durán Santomil, constitúe a terceira edición deste traballo, tras as de 2015 e 2021. O estudo analiza o grado de implantación da xestión integral do risco nas empresas galegas e ofrece unha radiografía da súa evolución, identificando fortalezas, debilidades e áreas de mellora.

Os resultados revelan unha realidade marcada por claros contrastes. Por unha banda, as empresas galegas son máis conscientes dos riscos aos que se enfrontan e avanzaron na integración desta cuestión na súa cultura corporativa. Non obstante, esta maior concienciación aínda non se traduciu en estruturas formais de xestión. A adopción de estándares internacionais como a ISO 31000 ou COSO segue a ser residual, os comités de riscos continúan a ser pouco habituais e apenas o 16,8 % das empresas conta cun responsable de riscos específico (*Chief Risk Officer*).

O estudo tamén pon de manifesto unha brecha significativa entre as grandes empresas e as pemes. As primeiras amosan niveis de madurez máis elevados en aspectos como o control interno, a auditoría, a comunicación de riscos á dirección e a existencia de políticas formalizadas, mentres que as pequenas e medianas empresas manteñen modelos moito menos estruturados.

"A empresa galega é hoxe máis consciente dos riscos aos que se enfronta ca hai cinco anos. O seguinte paso debe ser traducir esa maior conciencia en sistemas de xestión máis estruturados que lles permitan anticiparse ás ameazas e aproveitar as oportunidades", sinala Luis Otero González.

O estudo, baseado nunha enquisa a 477 empresas galegas, reflicte tamén un aumento xeneralizado no impacto percibido dos riscos. Nun contexto económico cada vez máis complexo, os riscos estratéxicos e normativos encabezan a lista, seguidos polos riscos operativos e financeiros. A análise dos riscos específicos que máis preocupan ás empresas destaca a actividade da competencia, as novas normativas, a xestión dos recursos humanos, a ciberdelincuencia e o custo das materias primas.
No que respecta aos riscos emerxentes, o estudo identifica a ciberseguridade como a ameaza máis inmediata para as organizacións, aínda que sinala que a contratación de seguros de ciberseguridade segue a ser baixa. O cambio climático está a gañar relevancia na axenda corporativa, malia que o investimento en adaptación e mitigación continúa a ser limitado. Pola súa banda, a intelixencia artificial aínda non se considera amplamente unha prioridade estratéxica, sendo a falta de persoal cualificado o principal obstáculo para a súa implementación.

Os investigadores salientan ademais que as empresas con sistemas de xestión de riscos máis desenvolvidos demostran unha maior capacidade para anticiparse ás situacións de crise e responder a elas, exhiben niveis máis elevados de resiliencia e obteñen mellores resultados en indicadores como o valor engadido bruto, a estabilidade da rendibilidade axustada ao risco e os niveis de endebedamento.

"A xestión de riscos non consiste só en reaccionar cando xorde un problema. Implica integrar o risco na estratexia empresarial para tomar mellores decisións, protexer o valor da organización e aproveitar as oportunidades que ofrece un contorno cada vez máis incerto", afirma Pablo Durán.

� vista dos resultados obtidos, o estudo avoga por avanzar cara a modelos de xestión de riscos máis maduros e estruturados. Para tal fin, recomenda reforzar a formación e a cultura de risco nas empresas, fomentar a profesionalización mediante roles especializados e órganos de goberno dedicados, colaborar co sector asegurador para deseñar solucións adaptadas ao tecido empresarial galego e integrar os riscos emerxentes na planificación estratéxica. Así mesmo, propón a creación dun Observatorio de Xestión de Riscos para supervisar de xeito continuo a evolución das empresas galegas e difundir as mellores prácticas.