jueves, 16 de abril de 2026
A cita científica, que reúne máis de duascentas persoas de 14 países de Latinoamérica, África e Europa, desenvólvese na Facultade de Ciencias da Educación ata o 17 de abril.
Segundo os organizadores, o encontro xurde da urxencia por comprender os actuais tempos de emerxencia climática, que tamén son de emerxencia social, política, cultural, institucional e educativa. Neste senso -apuntan-, faise máis imprescindible que nunca superar as barreiras artificiais entre escola e comunidade, entre o cognitivo e o sensible, entre a linguaxe científica e a cidadanía, para entender de maneira integral os tempos educativos e sociais nos que se desenvolve a vida individual e colectiva.
O encontro inaugurouse este mércores no Salón de Actos da Facultade coa presenza da reitora da USC, Rosa M. Crujeiras, e a participación ademais da decana do centro anfitrión, Mar Lorenzo; o director do Instituto de Investigación do Medio Acuático para unha Saúde Global (iARCUS), Carlos Pereira; e a co presidenta e o co presidente do congreso, Teresa Pozo e Pablo Ángel Meira, respectivamente.
Necesitamos impulsar unha transición socio-ecolóxica sen precedentes e hai que facelo con criterios de xustiza social e ambiental, dixo a reitora na apertura. Neste escenario a dimensión educativa, tamén das universidades, é especialmente relevante: debemos tomar conciencia da magnitude do reto, e dende a USC comprometémonos a traballar este ámbito tanto no que afecta o seu funcionamento interno como a súa proxección externa, a través da investigación, a formación do seu estudantado e a transferencia á sociedade, dixo.
Programa
O Congreso adopta catro tempos como eixos transversais que guíen marcos de diálogo, diagnóstico e deseño colectivo de propostas de políticas públicas -climáticas e educativas-, de praxes educativas pertinentes e de novas liñas de investigación para afrontar os desafíos climáticos, ambientais e sociais contemporáneos: Tempos de emerxencia climática, Tempos educativos e sociais, Tempos de acción polo clima e Tempos de sostenibilidade e cooperación.
Arredor destes catro Tempos artéllase un programa que contará con obradoiros, relatorios, paneis de experiencias e paneis de comunicacións nos que tentar dar resposta a estas emerxencias.
Estrea europea de curta
Previo ao congreso propiamente dito, este mércores tivo lugar a estrea europea da curtametraxe Lucie Sauvé, une vie forgée dans les terreaux de lengagement (Lucie Sauvé, unha vida forxada nos territorios do compromiso) (37 min. - VOSE), co dirixida por Sylvie Lapointe e Adolfo Agúndez Rodríguez, da Universidade de Montréal (Quebec), que participaron nun coloquio posterior xunto coa propia Lucie Sauvé, pioneira e referente internacional da Educación Ambiental.
Este órgano está formado por 12 expertos de recoñecido prestixio, tanto a nivel galego como internacional, nos ámbitos científico, tecnolóxico, empresarial e das políticas públicas. Na actualidade a Comunidade despunta en ámbitos como a biotecnoloxía, a intelixencia artificial ou a computación cuántica e acada numerosos fitos. O obxectivo deste consello asesor é apoiar e asesorar ao Executivo autonómico nas súas políticas públicas de I+D+i para seguir acadando éxitos e posicionando Galicia como un territorio de referencia nesta materia. As persoas que forman parte deste organismo, ademais do conselleiro, e a directora da Axencia Galega de Innovación, Carmen Cotelo, son cinco no eido da investigación, tres no das políticas públicas e catro no ámbito da innovación, empresa e emprendemento.
Galicia consolida a súa posición como a comunidade española que máis logrou reducir en 2024 as emisións netas de gases de efecto invernadoiro (GEI) con respecto a 1990, ano de referencia a nivel comunitario para as políticas en materia de clima. En concreto, a baixada rexistrada neste período foi do 68,5% fronte ao 12,8% no que se sitúa a media nacional. Os últimos datos oficiais dispoñibles volven situar a Galicia á cabeza da clasificación nacional en canto a redución de emisións netas. No período 1990-2024 Galicia logrou reducir en máis de dous terzos as súas emisións netas e tamén é a comunidade española que lidera a baixada de emisións GEI interanual, cun 9,8% menos que en 2023.
