Notas de prensa

Mover os Marcos arrinca este mércores en Compostela con conversas e concertos na Universidade

O ciclo de mesas de debate abrirase mañá, mércores 1 de outubro, con “Proxectos para vivir en galego”, unha conversa na que Carlos Callón, Alberto Pombo e Noemí García compartirán experiencias arredor de iniciativas educativas e sociais que teñen como obxectivo común salvagardar a lingua galega e garantir a súa transmisión ás novas xeracións.

O xoves 2 de outubro será a quenda de “Coidar do noso”, unha mesa coa presenza de ADEGA, Blondiemuser (Paula Vilaboy) e Rogelio Santos. A sesión recuperará a memoria das grandes loitas ecoloxistas galegas e conectaraas cos retos actuais, abordando tamén como a comunicación dixital pode transformar a sensibilización ambiental.

O venres 3 de outubro, o ciclo péchase con “Vivir na Galiza dos anos 20”, unha conversa centrada nos desafíos máis urxentes da mocidade actual: dereitos LGTBI, acceso á vivenda e migración. Intervirán Daniela Ferrández, a Plataforma Vivenda Xa e Barry Elhadj Mamadou (Guinea Conakry), achegando distintas perspectivas sobre como construír unha Galiza máis xusta e inclusiva.

Todas as conversas terán lugar no Auditorio de Xornalismo ás 18:30 horas e estarán abertas á participación do público.

Concertos falados: outra maneira de vivir a música

As noites do mércores e xoves estarán reservadas para os concertos falados, un formato que combina actuación en directo e entrevista, ofrecendo unha oportunidade única para coñecer en profundidade o proceso creativo das artistas e vivir a súa música desde outra ollada.

O mércores 1 de outubro, a Igrexa da Universidade acollerá o concerto falado de Hugo Guezeta, nunha sesión conducida por Rodri Míguez. O xoves 2 de outubro será a quenda de Alana, que compartirá escenario e conversa con Alejandra Tojo.

Ambas as citas comezarán ás 21:00 horas, con entrada libre ata completar aforo. As portas abrirán media hora antes.

PROGRAMACIÓN COMPLETA MOVER OS MARCOS 2025

Mércores, 1 de outubro
● 18:30 h | Auditorio de Xornalismo → Conversa: Proxectos para vivir en galego (Carlos Callón, Alberto Pombo e Noemí García)
● 21:00 h | Igrexa da Universidade → Concerto comentado con Hugo Guezeta, dinamiza Rodri Míguez

Xoves, 2 de outubro
● 18:30 h | Auditorio de Xornalismo → Conversa: Medio e ecoloxía: coidar do noso (ADEGA, blondiemuser, Rogelio Santos)
● 21:00 h | Igrexa da Universidade → Concerto comentado con Alana, dinamiza Alejandra Tojo

Venres, 3 de outubro
● 18:30 h | Auditorio de Xornalismo → Conversa Vivir na Galiza dos anos 20 (Sonia Díaz, Daniela Ferrández, Plataforma Vivenda Xa e Barry Elhadj Mamadou)

Sábado, 4 de outubro | Casa das Máquinas
● 12:00h → Break Dance coa Vella Escola
● 12:30h → Presentacións curtas: Rebelico, Lixo Atelier
● 13:00 h → Sesión vermú Concerto de Leria
● 16:00h → Podcast en directo Prendídisima
● 17:15 h → Actuación do Colectivo do Flow
● 18:30 h → Presentacións curtas: Horta Creativa, O Tinglao de Carnota, Orgullo Galego
● 19:00 h Podcast en directo Todo Mal
● 20:00 h → Concerto de Tiam GZ

*A xornada complementarase con postos dun mercadiño e espazos de conversa entre creadores, entidades e público.

Todas as actividades de Mover os Marcos 2025 son de balde e sen reserva ata completar aforo. O proxecto está promovido pola Deputación da Coruña en colaboración co Concello de Santiago e a Universidade de Santiago de Compostela e xestionado por Culturactiva S. Coop. Máis alá da súa programación, o festival quere deixar unha mensaxe clara: pensar, debater e celebrar xuntos é o camiño para construír unha vida mellor.